Беспрацоўны — патэнцыяльны бізнесмен
У цэнтра занятасці насельніцтва даволі шырокая сфера дзейнасці. Яго спецыялісты дапамагаюць людзям перасяліцца з горада ў вёску, прайсці перападрыхтоўку тым, хто не можа працаўладкавацца па ранейшай спецыяльнасці. І гэта толькі невялікая частка тых праграм, якія рэалізуюцца дзяржавай праз названую ўстанову.
Анжэла Лагунова, якая ў цэнтры працуе з 2007 года, адследжвае фінансаванне названых і іншых праграм. Па словах галоўнага спецыяліста, у апошнія гады значная частка дзяржаўных сродкаў расходуецца на субсідзіраванне перспектыўных бізнэс-планаў беспрацоўных.
Сёлета субсідыі для адкрыцця прыватнага прадпрымальніцтва былі выдадзены 7 чалавекам. Большасць іх атрымальнікаў знайшлі сваю нішу і замацаваліся на рынку паслуг. У іх ліку можна назваць бацьку і сына Шухто, якія ў Багушэўску займаюцца пасажыраперавозкамі. Бадроў з Сянно знайшоў сябе, арганізаваўшы выязны гандаль па сельскіх населеных пунктах, расказала Анжэла Лагунова (на здымку).