Даяркам таксама трэба вучыцца
Упраўленне сельскай гаспадаркі і харчавання райвыканкама правяло конкурс, удзел у якім прынялі лепшыя аператары машыннага даення гаспадарак раёна. У спаборніцтвах удзельнічалі 17 даярак з 14 сельгасарганізацый. У конкурсе не былі прадстаўлены толькі жывёлаводы КУСГП «Полымя». Затое ад саўгаса імя Машэрава, ААТ «Сенненскі райаграсервіс» і РУП «Дружбінец» выступалі па дзве канкурсанткі.
Наша дасье
У грамадскіх сельгасарганізацыях раёна працуе 287 аператараў машыннага даення. Самы высокі надой малака ад каровы маюць жывёлаводы РУП «Дружбінец» — 5323 кілаграмы, саўгаса імя Машэрава — 4595 кілаграмаў за 11 месяцаў. У індывідуальным заліку лідзіруюць Алена Берашэвіч з РУП «Дружбінец», якая за 11 месяцаў надаіла ад кожнай каровы па 6778 кг малака, і Ніна Бушняк з СВК «Бяленева» — 5537.
Без падарункаў не застаўся ніхто
Конкурс праходзіў у РУП «Дружбінец» на малочнатаварнай ферме Забор’е. Вынікі падводзіліся ў Доме культуры аграгарадка Нямойта, дзе ўсе ўдзельнікі конкурсу атрымалі каштоўныя падарункі за ўдзел у спаборніцтве, а таксама ў сувязі з набліжэннем новага года. Пераможцы і прызёры былі ўзнагароджаны яшчэ граматамі ўпраўлення сельскай гаспадаркі і харчавання райвыканкама, каб пазней у касах гаспадарак атрымаць прэміі: за першае месца — у памеры 7 базавых велічынь, другое — 5, трэцяе — 3.
Улічваючы, што вынікі конкурсу падводзіліся асобна сярод аператараў, якія працуюць на фермах з малакаправодам, і сярод тых, хто яшчэ выкарыстоўвае даільныя бачкі, узнагароджаных аказалася шэсць асоб.
Падобныя конкурсы ў раёне не праводзіліся даўно. І дарэмна, бо, як вызначыліся яго арганізатары, адной з мэт конкурсу была вучоба. Большасць даярак, якія працуюць сёння на фермах, не маюць спецыяльнай базавай падрыхтоўкі. Да таго ж на вытворчасці ўсё часцей выкарыстоўваюцца тэхналагічныя навінкі, дасягненні сучаснай навукі. Менавіта таму на конкурс запрасілі заатэхнікаў, якія, згодна з умовамі, маглі дапамагаць жывёлаводам пры падрыхтоўцы адказаў.
Спаборнічалі і вучыліся
Пачынаючы размову з удзельнікамі конкурсу, Раіса Маісеева, першы намеснік начальніка райсельгасхарчу, звярнула іх увагу на сувязь вытворчых паказчыкаў і матэрыяльнага ўзнагароджання за працу.
— Падрыхтоўка жывёлы і даільнага апарата, своечасовы пачатак даення, раздача канцэнтратаў у тым ці іншым парадку — гэтыя і іншыя тэхналагічныя прыёмы, выкананне якіх ускладзена на аператараў машыннага даення, могуць прыкметна ўздзейнічаць на колькасць і якасць малака, а значыць, і на заробак, — падкрэсліла яна. Вось чаму спачатку ўдзельнікам конкурсу прапанавалі паглядзець фільм на гэтую тэму. Жывёлаводы пазнаёміліся з умовамі працы, тэхналагічнымі асаблівасцямі работы на сучасных жывёлагадоўчых комплексах, у тым ліку на тых, дзе выкарыстоўваюцца робаты.
Конкурс праходзіў у некалькі этапаў. У якасці экзаменатараў выступалі спецыялісты ўпраўлення сельскай гаспадаркі і харчавання райвыканкама і раённых зоаветслужбаў. У час тэарэтычнага экзамена аператары машыннага даення бралі білет, адказвалі на змешчаныя ў ім пытанні. Кожны з канкурсантаў павінен быў таксама разабраць і сабраць даільны апарат. Каб памыць яго, даяркам рабіць гэта даводзіцца кожны дзень пасля завяршэння працэсу даення. На заключным этапе канкурсанты з аўдыторыі перайшлі ў памяшканне, дзе ўтрымліваецца жывёла.
Многае з убачанага здзівіла. Большасць з прыезджых канкурсантак уразілі жывёла, яе прадуктыўнасць, санітарны стан фермы. Здзівіла нават тое, што каровам штодня мяняюць падсцілку з саломы. Пры гэтым сістэма гноевыдалення функцыянуе без збояў. Удзельнікі конкурсу не хавалі — на многіх фермах так не робяць.
Урокі конкурсу
Здзіўляліся і экзаменатары. Узровень неабходных ведаў у многіх удзельнікаў конкурсу аказаўся даволі невысокі, практычныя дзеянні наводзяць на думку, што тэхналагічныя патрабаванні поўнасцю выконваюцца далёка не заўжды. І гэта лепшымі прадстаўнікамі прафесіі. Але з’явілася і спадзяванне, што арганізацыя пастаяннай вучобы з даяркамі дазволіць прыкметна павялічыць вытворчасць малака.
Зрэшты, для арганізатараў конкурсу такі вынік не стаў нечаканасцю. Генадзь Сабыніч, начальнік райсельгасхарчу, у час узнагароджання лепшых канкурсантак, казаў пра высокую адказнасць даярак перад калектывам, у якім яны працуюць.
— Малако — гэта канечны прадукт, у які ўкладзена праца механізатара і даглядчыка, кіраўніка і спецыяліста, — падсумаваў ён.
Эдуард Герасіменка, старшыня райвыканкама, які таксама выкарыстаў магчымасць сустрэцца з лепшымі жывёлаводамі раёна, акцэнтаваў ўвагу на неабходнасць вучыцца ўсім, вучыцца штодня.
— Частка малака на грамадскіх фермах губляецца таму, што іншыя даяркі не ўмеюць запусціць карову, у выніку жывёла хварэе на мастыт. Можна прыводзіць іншыя прыклады, што сведчыць пра слабую прафесійную падрыхтоўку, недакладнае выкананне тэхналагічных патрабаванняў, — шчыра выказаўся старшыня райвыканкама.
Вучыцца трэба. І не толькі на раённых конкурсах. Вучыцца трэба ў гаспадарках на спецыяльных семінарах. Вучыцца трэба самім даяркам. Сёння для гэтага маецца неабходная літаратура. А галоўнае, патрэбна разуменне неабходнасці такой вучобы.
Лепшыя з лепшых
Сярод даярак, якія працуюць на фермах з малакаправодам:
І — Людміла Глінская (РУП «Дружбінец»);
ІІ — Наталля Гардзецкая (ДП «Саўгас імя Машэрава»);
ІІІ — Алена Берашэвіч (РУП «Дружбінец»).
Сярод даярак, якія выкарыстоўваюць даільныя бачкі:
І — Людміла Пракаповіч (СВК «Сінягорскае»);
ІІ — Алеся Андрэева (ААТ «Сенненскі райаграсервіс»);
ІІІ — Наталля Бугаёва (СВК «Студзёнка»).
Пры падвядзенні вынікаў конкурсу ў разлік браліся не толькі набраныя балы. Улічваліся вытворчыя паказчыкі кожнай канкурсанткі і гаспадаркі, якую яна прадстаўляла, наяўнасць неабходнай дакументацыі. У выніку з ліку пераможцаў было выключана некалькі асоб, у якіх былі пратэрмінаваны санітарныя кніжкі.