КОМПЛЕКС-ГІГАНТ
Новы зернеачышальны сушыльны комплекс КЗССВ-ЗОН ААТ “Сенненскі райаграсервіс” атрымала ад Прэзідэнцкага Фонду падтрымкі сельгасвытворцаў. Сучасны і велічны, ён нібы падпірае аблокі. Што тычыцца прапускной магчымасці, то яна ў многім залежыць ад вільготнасці зерня. Норма складае 120 тон у суткі, а наогул на комплексе можна дапрацаваць да 300-400 тон. У час уборкі СВК “Ульянавічы”, УП “Насенняводчы саўгас імя Данукалава”, іншыя гаспадаркі раёна прывозяць зерне на комплекс для дапрацоўкі. Так што даводзіцца працаваць у напружаным рытме.
Увесь працэс сушкі камп’ютарызаваны. За пультам кіравання знаходзяцца інжынер кантрольна-вымяральных прыбораў і аўтаматыкі Руслан Уладзіміравіч Стрыжнёў і яго памочнік Анатолій Аркадзьевіч Кашпар.
Руслан Стрыжнёў сам з Віцебска. У Гарадоцкім тэхнікуме атрымаў спецыяльнасць. Пасля заканчэння навучальнай установы паўгода працуе ў ААТ “Сенненскі райаграсервіс”. Ці застанецца малады спецыяліст на Сенненшчыне, пакажа час. А пакуль Руслана тут усё задавальняе.
Работа арганізавана ў тры змены. Маючы ў раёне такую сушыльную гаспадарку, зберагчы вырашчаны ўраджай, забяспечыць яго якасць будзе значна лягчэй. Няхай цячэ зерне “залатой ракой” у вёску Багданава на гэты зернесушыльны комплекс.
Ларыса Мукамолава.
