Стагадовы юбілей адзначыла найстарэйшая жыхарка Сенненскага раёна

Чацвярымі дзяцьмі, васьмярымі унукамі, адзінаццаццю праўнукамі і дваімі прапраўнукамі —такой вялікай сям’ёй сёння можа пахваліцца Марфа Мацвееўна Шафранская, жыхарка в.Свабоднае Багданаўскага сельсавета.  

 На днях яна адзначыла свой стагадовы юбілей.

У маленькай вясковай хаце ледзь змясціліся тыя, хто ў гэты дзень прыехаў павіншаваць Марфу Мацвееўну. Сваякі,  госці з раёна: Алег Цяцюеў, кіраўнік спраў райвыканкама, Віктар Мурашкевіч, старшыня Багданаўскага сельскага Савета, Сяргей Пагарэльскі, намеснік дырэктара ААТ «Сенненскі райаграсэрвіс» па ідэалагічнай рабоце — усе з кветкамі, падарункамі, цёплымі пажаданнямі. Міхаіл Архіпаў, начальнік Сенненскага раённага аддзела ўнутраных спраў, разам з Наталляй Булыняй, старшым інспектарам падраздзялення па грама­дзянству і міграцыі, уручылі юбілярцы новенькі пашпарт.

 Усё пасляваеннае жыццё Марфа Шафранская рупілася на палявых работах. Спачатку — у  Гарнаках, потым — у Свабодным.  Цяжка было, бо палову жыцця Марфа Мацвееўна пражыла без мужа. «І як бы складана маці не было, — гавораць дзеці, — яна ніколі нам не паказвала свае слёзы. Наадварот, падба­дзёрвала добрым словам, хаваючы ў сабе боль, перажыванні».

 Сёння Марфу Мацвееўну даглядае дачка Валянціна, якая даўно ўжо на пенсіі. Кожныя выхадныя наведваюцца ўнукі: і па гаспадарцы дапамагчы, і проста пасядзець за кубачкам гарбаты з блізкім чалавекам.

 У свае сто гадоў юбілярка захавала здаровы розум. Пайменна памятае сваіх родных. Хоць і слых ужо не той, нярэдка і па тэлефоне з блізкімі размаўляе. А з артыстамі раённага дома культуры, якія таксама завіталі на сямейнае свята, нават праспявала «Катюшу».

Ала ЯКАЎЛЕВА.

Добавить комментарий

Ваш e-mail не будет опубликован. Обязательные поля помечены *