Сенненскія дарожныя і камунальныя службы гатовы да зімовых умоў надвор’я

І хоць на календары яшчэ значыцца восень, зіма ўжо нагадала пра сябе мокрым снегам і замаразкамі. Хутка іх зменяць завірухі і сапраўдныя маразы. Наколькі гатовы дарожныя і камунальныя службы да зімовых умоў надвор’я, высвятляла карэспандэнт «ГС».

   На сённяшні дзень на падсыпку гарадскіх дарог у Сенненскім РУП ЖКГ нарыхтавана 400 тон пясчана-салянай сумесі, з іх 14 т накіраваны на абслугоўванне дарог г.п.Багушэўск. Драўлянымі пляцоўкамі для часовага ўтрымання рэагентаў абсталяваны 45 месцаў. На вуліцы горада гатовы выехаць два пескараскідальнікі, два пагрузчыкі і іншая тэхніка, прызначаная для расчысткі снегу. Па словах Галіны Барбарчык, начальніка ўчастка па добраўпарадкаванні, у Багушэўску і Машканах таксама маюцца неабходныя машыны.

 Падрыхтоўка да працы ў зімовы перыяд у філіяле «Сенненскае дарожнае рамонтна-будаўнічае ўпраўленне №146» КУП «Віцебскаблдарбуд» ідзе згодна з планам. Як паведамілі ў ДРБУ, гатоўнасць снегаўборачнай тэхнікі складае 100%. Для падсыпкі дарог раёна нарыхтавана 2479 т пясчана-салянай сумесі, у тым ліку 48 т ужо развезена па аўтобусным прыпынкам. Нарыхтавана 55,3 тоны аргана-мінеральнай сумесі, якая будзе выкарыстоўвацца па меры неабходнасці пры выкананні ямачнага рамонту. Як паведаміў Раман Сочнеў, галоўны інжынер ДРБУ-146, у бліжэйшы час на пэўных участках дарогі ўстановяць папераджальныя дарожныя знакі.

 Ала ЯКАЎЛЕВА.

Здымак носіць ілюстрацыйны характар.