В ОАО «Студёнка» ждут богатый урожай рапса

     У ААТ «Студзёнка» першым на палеткі свой зернеўборачны камбайн вывеў адзін з самых вопытных механізатараў сельгасарганізацыі Міхаіл Семерыкоў.

    — Свой чарговы жніўны сезон ён пачаў з абмалоту насеннікаў ранніх злакавых траў, намалаціўшы больш за 6 тон вораху купкоўкі. А тым часам паспеў азімы рапс, дзе Міхаіл таксама спачатку працаваў адзін. Праўда, назаўтра яму на дапамогу прыйшоў Міхаіл Будчанка, пастаянным месцам працы для якога з’яўляецца Багушэўскі лясгас. На час жніва ён сеў за штурвал зернеўборачнага камбайна, — расказаў Андрэй Дзядушка, галоўны аграном сельгасарганізацыі.
    А завяршылі ўборку алейнай культуры тры экіпажы. Студзёнкаўцы паклікалі на дапамогу Леаніда Яцкевіча з ААТ «Сенненскі райаграсэрвіс». Кіраўніцтва сельгасарганізацыі ўпэўнена — у полі трэба спяшацца, каб пазбегнуць страт і мець дывідэнды ад вырашчанай прадукцыі.
    Зерне рапсу з поля дастаўляецца на ток, дзе праходзіць першасную ачыстку, падсушваецца перад тым, як патрапіць на перапрацоўчы завод. Згодна з дзяржзаказам ААТ «Студзёнка» павінна паставіць 120 тон рапсу.
    — Першыя партыі зерня алейнай культуры залічана першым класам. Гэта значыць, што за тону сельгасарганізацыя атрымае па 650 рублёў. Не будзе праблем і з аб’ёмам паставак, — упэўнены Андрэй Дзядушка.
     Са 115 га, што былі засеяны азімым рапсам, намалочана 222 тоны зерня. З кожнага гектара у ААТ «Студзёнка» атрымалі па 19,3 цн. Вышэйшая ўраджайнасць толькі ў ВДМС. А ў першы дзень уборкі на полі, дзе не было вымачак, дзе зрабілі вясной падкормку азотам, на круг збіралі па 35 цн.
    У ААТ «Студзёнка» завяршаецца рамонт астатніх камбайнаў. На пачатку наступнага тыдня ўсе яны павінны прыступіць да абмалоту хлебных ніў. Аднак дагнаць калегам Міхаіла Семерыкова будзе няпроста. Ён ужо запісаў на свой рахунак больш 100 т тон зерня рапсу.
Аляксандр ЯЎГЕНАЎ.
НА ЗДЫМКАХ: зерне азімага рапса дапрацоўваецца перад адпраўкай на завод; Міхаіл Семерыкоў у час невялікага перапынку.
Фота аўтара.