Сенненский РОВД по итогам работы за 2019 год признан лучшим среди отделов второй, самой конкурентной категории

Аддзел унутраных спраў Сенненскага райвыканкама па выніках работы за 2019 год прызнаны лепшым сярод аддзелаў другой, самай канкурэнтнай катэгорыі, у якую ўваходзіць 15 РАУС, і ўзнагароджаны пераходным ганаровым прызам “Святы Георгій” УУС аблвыканкама – за высокія паказчыкі ў аператыўна-службовай дзейнасці.

 Бронзавая статуэтка начальніку РАУС была ўручана на калегі ўпраўлення ўнутраных спраў, на якой прысутнічаў міністр Юрый Караеў. Разам з прызам Віктар Пракаповіч атрымаў ключы ад новага службовага аўтамабіля.

 — Безумоўна, прыемна, што наша работа так высока ацэнена, а галоўнае, што яна прынесла плён сенненцам. На выніковую калегію былі запрошаны намеснікі, начальнікі аддзелаў і службаў. А мне хочацца, каб усе супрацоўнікі аддзела перажылі прыемныя эмоцыі, каб яны дапамагалі нам працаваць яшчэ лепш, — выказаўся Віктар Пракаповіч перад тым, як аб’явіць усяму саставу РАУС падзяку ад кіраўніцтва ўпраўлення ўнутраных спраў аблвыканкама.

 

У 2019 годзе ў Сенненскім раёне зафіксавана зніжэнне агульнай колькасці зарэгістраваных злачынстваў з 241 да 235, незарэгістравана прычыненняў цяжкіх цялесных пашкоджанняў, згвалтаванняў, разбойных нападаў. Сенненскія міліцыянеры актыўна супрацьстаялі алкагалізацыі грамадства. З незаконнага абароту выведзена 247,5 літра фальсіфікаваных спіртных напіткаў, за распіццё алкагольных, слабаалкагольных напіткаў ці піва ў грамадскіх месцах, за з’яўленне ў іх, а таксама на працы ў нецвярозым стане жыхары раёна прыцягваліся да адказнасці 929 разоў. У той жа час колькасць дарожна-транспартных здарэнняў з удзелам нецвярозых вадзіцеляў вырасла з 0 да 3.

 У раёне не дапушчана росту здарэнняў на дарогах па віне пешаходаў, не рэгістраваліся ДТЗ з удзелам непаўналетніх. Інспектары ДАІ актыўна працавалі па выяўленні грубых парушэнняў правілаў дарожнага руху.

 Зніжана колькасць злачынстваў, учыненых у паўсядзённым побыце. Павысіўся працэнт раскрывальнасці злачынстваў.

 На сходзе з нагоды ўручэння ганаровага прыза прысутнічаў амаль увесь калектыў раённага аддзела. У ім прыкметна стала больш маладых асоб. І не толькі мужчын. Як правіла, у калектыў уліваюцца асобы, якія скончылі вышэйшыя навучальныя ўстановы Міністэрства унутраных спраў, ці маюць вышэйшую юрыдычную адукацыю.

 

 

— Маладая кроў, спецыяльная падрыхтоўка, безумоўна на карысць справе, бо ўносяць навізну, крэатыў у аператыўную работу, павышаюць канкурэнтную базу, — лічыць Віктар Пракаповіч. Але галоўнае, на яго думку, у тым, што работа ў аддзеле праводзіцца сістэмна, пастаянна ўдасканальваецца. Добры вынік дае зладжанае ўзаемадзеянне з органамі ўлады і грамадскімі арганізацыямі па пытаннях прафілактыкі правапарушэнняў і злачынстваў. Так што поспех сенненскіх міліцыянераў – гэта і іх поспех.

Аляксандр ЯЎГЕНАЎ.

 Фота аўтара.