У грамадскай прыёмнай раённага выканаўчага камітэта правёў прыём грамадзян дырэктар Рэспубліканскага цэнтра па аздараўленні і санаторна-курортным лячэнні насельніцтва Генадзь Балбатоўскі

 Першым на прыём прыйшоў жыхар г.Сянно, пенсіянер Фёдар Чарняўскі. Фёдар Уладзіміравіч паведаміў, што ўжо амаль два гады стаіць у чарзе на атрыманне пуцёўкі на санаторнае лячэнне, якое яму рэкамендавана па медыцынскіх паказчыках.

Раней, калі працаваў, пуцёўкі прапаноўвалі кожны год, цяпер даводзіцца доўга чакаць. А санаторый «Лётцы», у які і дабрацца зручна, і лячэнне там як раз па профілі, стаў зусім недаступным пенсі­янерам, зазначыў Фёдар Чарняўскі.

Генадзь Балбатоўскі патлумачыў, што некалькі гадоў таму Цэнтру, які ён узначальвае, былі перададзены чатыры санаторыя Мінпрацы разам з дзесяцігадовай чаргой. Цяпер яе ўдалося істотна зменшыць.

У раёне ў чарзе на атрыманне пуцёвак стаіць 229 непрацуючых, уключаючы інвалідаў І і ІІ груп, якіх імкнуцца забяспечыць санаторна-курортным лячэннем адзін  раз у два гады. Што тычыцца іншых пенсіянераў, яны змогуць атрымаць пуцёўку адзін раз у 3-4 гады. Цяпер Цэнтр закупляе пуцёўкі ва ўсе санаторыі Беларусі. На гэтыя мэты сёлета выдзелены 1 трлн рублёў.

Наконт санаторыя «Лётцы» Генадзь Балбатоўскі патлумачыў наступнае. Санаторый забяспечвае сваю дзейнасць самастойна, не атрымлівае дзяржаўнай падтрымкі, таму не прымае ўдзелу ў аўкцыёнах па продажы пуцёвак, а займаецца іх рэалізацыяй самастойна па поўнай цане.

Пакуль падыдзе чарга Фёдару Чарняўскаму было прапанавана прайсці курс рэабілітацыі ў аддзяленні кардыялогіі шпіталя ў Юрцаве.

Старшыня раённага савета ветэранаў Ядвіга Сыраваткіна звярнулася да дырэктара Рэспубліканскага цэнтра па аздараўленні і санкурлячэнні, каб удакладніць некаторыя пытанні, якія хвалююць членаў ветэранскай  арганізацыі. У прыватнасці, было выказана пажаданне, каб ветэранам выдзяляліся пуцёўкі ў бліжэйшыя санаторыі, бо ў аддаленыя пажылым людзям дабірацца складана.

На ўсе пытанні наведвальнікаў Генадзь Балбатоўскі даў канкрэтныя адказы.

 Таццяна Буракова.