За кубкам кавы дзверы трымаем адкрытымі

Пасля трагедыі ў Кемераве прэзідэнт Беларусі даручыў кіраўнікам падраздзяленняў МНС праверыць, наколькі бяспечныя аб’екты з масавым знаходжаннем людзей. У сувязі з гэтым інспекцыя нагляду і прафілактыкі Сенненскага РАНС пазапланава праверыла аб’екты грамадскага харчавання райспажыўтаварыства. Абследаваны пяльменная “Лепім Самі”, рэстаран “Акропаль”, бар, “Кафейня”, кафэ-бар “Вернісаж”. Правяралася наяўнасць і спраўнасці тэхнічных сродкаў пажаратушэння, аўтаматычнай пажарнай сігналізацыі, стан эвакуацыйных шляхоў і выхадаў.

 У ходзе маніторынгу выяўлены парушэнні патрабаванняў правілаў пажарнай бяспекі на кожным аб’екце грамадскага харчавання. У прыватнасці, не ўсе памяшканні абсталяваны аўтаматычнай пажарнай сігналізацыяй, не хапае вогнетушыцеляў. У бары і “Кафейні”, прылады, што забяспечваюць самазакрыванне дзвярэй – даводчыкі, – знаходзяцца ў няспраўным стане. У рэстаране “Акропаль” дзверы ўвогуле не абсталяваны імі. У спісе парушэнняў і падключэнне электрычных прыбораў праз трайнікі і падаўжальнікі. 

 Узніклі пытанні і па афармленні дакументацыі. Так, у “Лепім Самі” няма плана эвакуацыі людзей, у рэстаране ён патрабуе перапрацаўкі. Адсутнічаюць інструкцыі аб мерах пажарнай бяспекі, не распрацаваны планы дзеянняў у выніку ўзнікнення пажараў. Ды і сам персанал, як высветлілася, не ведае правілаў паводзін у выпадку надзвычайных сітуацый, не ўмее прымяняць сродкі пажаратушэння. Супрацоўнікі Сенненскага РАНС правялі для іх інструктаж.

 Усе выяўленыя недахопы знаходзяцца на кантролі. Адказным асобам вынесены прадпісанні па іх ухіленні.

 Ала ЯКАЎЛЕВА.

 

Добавить комментарий

Ваш e-mail не будет опубликован. Обязательные поля помечены *