Старшыня Сенненскага выканкама Віктар Цапота сустрэўся з насельніцтвам Студзёнкаўскага сельсавета
Разам з кіраўніком раённай выканаўчай улады ўдзел у размове бралі старшыня райсавета Міхаіл Вілюга, галоўны ўрач цэнтральнай раённай бальніцы Ігар Мізаўцоў, старшыня райспажыўтаварыства Аляксандр Пуцята, дырэктар РУП ЖКГ Аляксандр Зеляня, Сяргей Мяцеліца, начальнік аддзела ідэалагічнай работы райвыканкама. Мясцовае насельніцтва прадстаўлялі старэйшыны вёсак, прадстаўнікі працоўных калектываў арганізацый, прадпрыемстваў.
Найбольш праблем у сістэме гандлёвага і медыцынскага абслугоўвання. У прыватнасці, апошнім часам закрыты магазіны ў такіх населеных пунктах як Пустынкі, Новае Сяло. «Не разумею, навошта трэба было гэта рабіць, калі гандлёвыя кропкі мелі даволі высокі тавараабарот, выконвалі планавыя заданні», — не хаваў здзіўлення Васіль Бараноўскі. Тым больш, што гандаль праз аўталаўкі мае шэраг недахопаў: культура абслугоўвання, асартымент выклікаюць прэтэнзіі з боку насельніцтва.
«Закрыццё магазінаў не на карысць і для райспажыўтаварыства», — упэўнены Аляксандр Пуцята, дырэктар гандлёвай арганізацыі. Ён прывёў такі прыклад: «У Алексінічах, пасля таго як аднавіў работу магазін, за першыя пяць дзён, тавараабарот склаў 25 мільёнаў рублёў». Кіраўнік райспажыўтаварыства паабяцаў, што работа аўтамагазінаў будзе ўзята на больш жорсткі кантроль, а ў Новым Сяле, Пустынках гандлёвыя кропкі адновяць работу.
Віктар Цапота лічыць, што сельскія магазіны павінны больш мэтанакіравана працаваць над фарміраваннем заказаў для жыхароў вёскі, займацца закупам лішкаў сельгаспрадукцыі, дапамагаць у забеспячэнні жывёлы вяскоўцаў кармамі.
Не хапае ў Студзёнкаўскім сельсавеце і медработнікаў ФАПаў. Маладыя спецыялісты хутка з’явяцца, але на які час? Усе размеркаваныя сёлета ў раён — жыхары Віцебска. Такія тлумачэнні даў Ігар Мізаўцоў, галоўны ўрач ЦРБ.
Размова ішла таксама пра работу іншых устаноў сацыяльнай сферы: клубаў, бібліятэк, паштовых аддзяленняў сувязі. Вялікіх нараканняў на іх работу ў насельніцтва няма. А вось стан дарог вяскоўцаў не задавальняе. Не хапае пашаў для кароў, якія ўтрымліваюцца на ўласных падворках. Адна з жыхарак Студзёнкі, што жыве ў двухпавярховым доме, які знаходзіцца на балансе РУП ЖКГ, у роспачы паведаміла, што ў час дажджоў яе кватэру залівае вадой, бо працякае дах.
Па ўсіх праблемах Віктар Цапота даў даручэнні адказным асобам. Заключным акордам сустрэчы з насельніцтвам стаў прыём па асабістых пытаннях, які правёў старшыня райвыканкама.
Аляксандр ЛАЗЮК.
Падрабязнасці чытайце ў “Голас Сенненшчыны” №39, 19 мая 2012г.
