Залатымі літарамі ў гісторыю Сенненшчыны
Знайсці дом Яўгена Мікітавіча Усціновіча па вуліцы Заводскай у Сянно цяпер няцяжка. Фасад будынка ўпрыгожвае інфармацыйная дошка. «У гэтым доме жыве… заслужаны трэнер БССР» — апавяшчае прахожых надпіс на ёй.
Ушанаванне подобным чынам сенненцаў, якія зрабілі ці робяць значны ўклад у развіццё малой радзімы — ініцыятыва раённага камітэта Камуністычнай партыі Беларусі. На мінулым тыдні яна рэалізавалася.
Яўген Мікітавіч Усціновіч невыпадкова абраны першым, чыё імя з,явілася на сцяне роднага дома. Член Камуністычнай партыі, старшыня раённага савета ветэранаў, актывіст, вядомы сваёй спартыўнай і грамадскай дзейнасцю.
Адкрыццё інфармацыйнай дошкі суправаджалася ўрачыстым мітынгам. Ушанаваць імя земляка прыйшлі сябры і калегі па ветэранскай і партыйнай арганізацыях, спорце, супрацоўнікі і выхаванцы Сенненскай спецыялізаванай дзіцяча-юнацкай школы алімпійскага рэзерву, а таксама родныя і блізкія людзі. Нямала добрых слоў у адрас Яўгена Мікітавіча выказалі першы сакратар РК КПБ Уладзімір Бяляцкі, начальнік аддзела фізкультуры, спорту і турызму Аляксандр Гардзецкі. Трэнер СДЮШАР Валерый Лектараў называе Яўгена Усціновіча сваім настаўнікам. Дзякуючы яму Валерый Міхайлавіч звязаў сваё жыццё з Сенненшчынай і біятлонам. Цяпер Яўген Мікітавіч ганарыцца сваім вучнем і правапераемнікам. Менавіта з імем Усціновіча звязана развіццё і станаўленне біятлона на Сенненшчыне — самым паспяховым відам спорту для нашага раёна. Выхаванцы Валерыя Лектарава і іншых трэнераў Сенненскай СДЮШАР пастаянна займаюць прызавыя прыступкі на рэспубліканскіх і міжнародных спаборніцтвах. Ці многіх з іх чакае слава выбітнага сенненца, трохразовага чэмпіёна свету Пятра Івашкі — прадказваць рана. Але той факт, што сёння ў складзе нацыянальнай зборнай страляючых лыжнікаў знаходзіцца 7 спартсменаў — ураджэнцаў Сенненшчыны, сведчыць пра многае. І шмат у чым тут ёсць заслуга Яўгена Усціновіча.
Права зняць покрыва з дошкі пад гукі духавога аркестра атрымалі Уладзімір Станкевіч, кандыдат спорту па велагонках, і Аляксандр Баркавец, кандыдат спорту па лыжных гонках.
Вялікую падзяку ініцыятары акцыі выказваюць і тым грамадзянам, прадпрыемствам, установам, якія аказалі матэрыяльную і арганізацыйную падтрымку, у прыватнасці, індывідуальным прадпрымальнікам М.Мяснікавай, А.Лапеху, М.Фурману, Л.Калмыкову, ААТ «Сенненскі льнозавод» (дырэктар Б.Уласевіч), ААТ «Літусава» (дырэктар М.Каўрыжэнка), пры ўдзеле аддзелаў ідэалагічнай работы, фізкультуры, спорту і турызму райвыканкама, АТП №20, тэрытарыяльнага цэнтра сацыяльнага абслугоўвання насельніцтва і многіх іншых.
Арганізатары спадзяюцца, што першая інфармацыйная дошка пакладзе пачатак добрай традыцыі.
Вольга БАНДАРЭВІЧ.
На здымку: У.Станкевіч і А.Баркавец адкрываюць інфармацыйную дошку на доме Я.Усціновіча.