Камбайнерскія мары Канстанціна Яцкевіча і Валерыя Гарбачова
Упершыню прадстаўнікі Сенненшчыны сталі лідарамі ў вобласці на жніве. На першае месца раён вывелі два маладыя хлопцы Канстанцін Яцкевіч і Валерый Гарбачоў. На сваім камбайне «КЗС-1218» яны намалацілі, па стане на 27 ліпеня, 274 тоны зерня, што стала лепшым вынікам у абласным спаборніцтве сярод маладзёжных экіпажаў камбайнераў.
— Тандэм Яцкевіч-Гарбачоў — зусім новы, — кажа дырэктар ААТ «Сенненскі райаграсервіс» Мікалай Курс. — Сёлета хлопцы ўпершыню селі за штурвал. Дагэтуль Канстанцін Яцкевіч рупіўся на трактары «МТЗ-3022» механізатарам. Памочнік камбайнера Валерый Гарбачоў — малады спецыяліст.
Кажуць, навічкам шанцуе. Па словах маладых лідараў, поспех стаў для іх прыемнай нечаканасцю. Праўда, сёння хлопцы ўжо мараць пра абласныя і, нават, рэспубліканскія «Дажынкі». А пакуль яны атрымалі Падзяку і памятныя сувеніры з рук першага сакратара раённага камітэта БРСМ Аляксандра Абушкевіча і старшыні РК прафсаюза работнікаў АПК Анатоля Кучынскага.
Для экіпажаў, якія першымі намалоцяць 1000, 1500, 2000 і 3000 тон зерня, арганізатары абласнога маладзёжнага спаборніцтва (аддзел па справах моладзі аблвыканкама і абласная арганізацыя прафсаюза работнікаў АПК) заснавалі грашовыя прэміі. Нашым хлопцам ёсць да чаго імкнуцца. А там, магчыма, і камбайнерскія мары аб «Дажынках» спраўдзяцца.
Вольга БАНДАРЭВІЧ.
На здымку: А.Абушкевіч, К.Яцкевіч, В.Гарбачоў і А.Кучынскі.