Якіх стандартаў не хапае сенненцам?
У адпаведнасці з Пастановай Савета Міністраў Рэспублікі Беларусь №1299 дзяржаўныя сацыяльныя стандарты па абслугоўванні насельніцтва з’яўляюцца абавязковымі для выканання ў арганізацыях усіх форм уласнасці, выкарыстоўваюцца пры фарміраванні мясцовага бюджэту. Устаноўленыя нарматывы ў грашовым вылічэнні штогод з улікам сродкаў, прадугледжваемых законам аб бюджэце Рэспублікі Беларусь на чарговы фінансавы год, пераглядаюцца і зацвярджаюцца аблвыканкамам. Выкарыстоўваюцца пры стварэнні сацыяльнай інфраструктуры ў аграгарадках, што фарміруюцца ў адпаведнасці з Дзяржаўнай праграмай адраджэння і развіцця вёскі. Словам, гэта той мінімум выгод, даброт, паслуг, які павінен атрымаць грамадзянін адпаведна свайму статусу.
Якасць выканання сацыяльных стандартаў у раёне была нядаўна прадметам абмеркавання на чарговым пасяджэнні райвыканкама. Адзначалася, што з 41 зацверджанага сацыяльнага стандарта не выконваюцца нарматывы, або выконваюцца не ў поўным аб’ёме, па 4 сацыяльных стандартах.
У сферы жыллёва-камунальнай гаспадаркі ўкаранёна адзінаццаць сацыяльных стандартаў. Аднак да нарматыву па ўдзельнай вазе вуліц з удасканаленым пакрыццём не дацягваюць пакуль Багданаўскі і Студзёнкаўскі сельсаветы.
Для паляпшэння якасці выканання стандартаў па ацяпленні жылых памяшканняў і тэмпературы гарачай вады ў другой палове мінулага года працягваліся работы па замене састарэлых стальных труб на папярэдне ізаляваныя (заменена 2550 пагонных метраў). Для якаснай падачы вады на артэзіянскіх свідравінах заменены 4 глыбінныя помпы.
Без абмежаванняў і ў запатрабаваных аб’ёмах выконваюцца нарматывы спажывання электраэнергіі ў дамах з газавымі і электраплітамі ў месяц на аднаго чалавека.
Аўтобуснымі зносінамі ахоплены ўсе цэнтральныя сядзібы сельскіх Саветаў дэпутатаў і сельгаспрадпрыемстваў, аграгарадкі, усе населеныя пункты з колькасцю двароў звыш 10. Выконваюцца нарматывы абслугоўвання насельніцтва на ўнутрыабласных (міжгародніх) маршрутах, штодзень робіцца больш за 10 зваротных рэйсаў па маршруту «Сянно — Віцебск».
Выконваюцца сацстандарты ў галіне адукацыі: па ахопу дзяцей дашкольнага ўзросту месцамі ў дашкольных установах; па забяспечанасці школьнікаў агульнай плошчай у агульнаадукацыйных установах, спартыўнымі збудаваннямі. Летась выкананы вялікі аб’ём работ па паляпшэнні тэхнічнага стану матэрыяльнай базы. Зроблены капітальны рамонт мяккага даху асноўнага будынка Беліцкай сярэдняй школы, над спартыўнай залай і харчблокам, дахі адрамантаваны ва Ульянавіцкай і Ходцаўскай сярэдніх дзіцячых садах-школах.
Рэалізацыю нарматываў у галіне культуры забяспечваюць 32 бібліятэкі, 27 клубных устаноў, Дом рамёстваў, гісторыка-краязнаўчы музей, раённы метадычны цэнтр, 2 дзіцячыя школы мастацтваў і музычная школа. Нарматыў расходаў па культуры ў пераліку на аднаго чалавека перакрыты больш як у тры разы.
Забяспечваюцца нарматывы па электроннай і паштовай сувязі. Аднак не выкананы нарматывы па забяспечанасці ўрачамі пярвічнага звяна, забеспячэнні насельніцтва кругласутачнымі месца-ложкамі.
Не аснашчана кінавідэапраекцыйным абсталяваннем 12 клубных устаноў у аграгарадках.
У сваім рашэнні раённы выканаўчы камітэт адзначыў недастатковую работу раённага спажыўтаварыства па прадастаўленні насельніцтву паслуг грамадскага харчавання і абавязаў выправіць становішча, і перш за ўсё ў аграгарадках. Аднавіць работу кафетэрыя ў Машканах.
Галоўны ўрач установы аховы здароўя «Сенненская ЦРБ» І.М.Мізаўцоў абавязаны ўзмацніць работу па ўкамплектаванні ўстановы аховы здароўя неабходнымі кадрамі.
Начальнік аддзела культуры Л.Я.Новікава павінна рашыць пытанне з устаноўкай кінавідэапраекцыйнага абсталявання ў аграгарадках Янова, Какоўчына, Багушэўска, Рулёўшчына, Літусава, Багданава, Ходцы, Белая Ліпа, Студзёнка, Полымя, Сінягорскае, Ульянавічы, Кругляны.
Кіраўнікі раёна абавязаны працягваць работу, накіраваную на падтрыманне ўзроўню абслугоўвання насельніцтва ў строгай адпаведнасці з нарматывамі дзяржаўных сацыяльных стандартаў.