Віцебскія ВНУ і ССНУ прыехалі на Сенненшчыну за студэнтамі
Набліжаецца адказная пара выпускных экзаменаў, а потым і ўступных іспытаў для выпускнікоў школ. Кожны з іх стаіць на парозе самастойнага жыцця, у якім ці не галоўную ролю адыгрывае выбар прафесіі.
Днямі ў актавай зале сярэдняй школы №2 горада была арганізавана сустрэча вучняў 11 класаў сенненскіх сярэдніх школ №1 і №2, Студзёнкаўскай і Багданаўскай школ з выкладчыкамі вышэйшых, сярэдніх спецыяльных і прафесійна-тэхнічных навучальных устаноў.
Пра ўмовы паступлення, тэрміны навучання, уступныя экзамены, пра спецыяльнасці, якія можна атрымаць ва УА «Віцебская «Знак Пашаны» дзяржаўная акадэмія ветэрынарнай медыцыны», у Беларускай дзяржаўнай ордэнаў Кастрычніцкай рэвалюцыі і Працоўнага Чырвонага Сцяга сельскагаспадарчай акадэміі, Віцебскім дзяржаўным універсітэце імя П.М.Машэрава, Віцебскім дзяржаўным каледжы культуры і мастацтва, Полацкім дзяржаўным універсітэце, Аршанскім дзяржаўным прафесійна-тэхнічным вучылішчы №110 будаўнікоў, Віцебскім дзяржаўным тэхнічным каледжы, Віцебскім дзяржаўным політэхнічным каледжы, аграрным каледжы УА «Віцебская «Знак пашаны» дзяржаўная акадэмія ветэрынарнай медыцыны» паведамілі прадстаўнікі гэтых навучальных устаноў.
З дапамогай відэаролікаў адзінаццацікласнікі пазнаёміліся з тым, як наладжаны быт, арганізаваны вольны час, якія факультэты прапануюць для вывучэння ў вышэйпералічаных установах.
З невялікай музычна-гумарыстычнай кампазіцыяй выступілі студэнты політэхнічнага каледжа.
Вынікі сустрэчы падвяла спецыяліст аддзела адукацыі райвыканкама Алена Шафранская. Алена Паўлаўна адзначыла, што любая спецыяльнасць, выбраная маладымі людзьмі, гарантуе ім перспектыўную працу і дастойны заробак.
Ларыса Мукамолава.