Спорт учит ставить цели и достигать их, уверен Ваня Быков, ученик Ходцевской школы
Спорт вучыць ставіць мэты і дасягаць іх, садзейнічае развіццю самаарганізаванасці, упэўнены Ваня Быкаў, вучань 11 класа Ходцаўскай школы.
Яшчэ крыху – і Ваня пераступіць парог школы, пойдзе ў дарослае жыццё. Але ўжо сёння ён дакладна ведае, што свой лёс звяжа са спортам. У яго планах – паступленне ва ўніверсітэт імя П.М.Машэрава на факультэт фізічнага выхавання і здароўя.
Спорт у жыцці маладога чалавека займае значнае месца. Ён прымушае рухацца наперад, нягледзячы на складанасці, адзначае Ваня, дае зарад аптымізму і бадзёрасці, словам, гэта своеасаблівыя лекі ад дрэннага настрою.
Біятлон – яго аддушына. Пачаў займацца гэтым відам спорту яшчэ ў пачатковых класах. Аляксандр Окунь, трэнер Сенненскай СДЮШАР, і прывіў Ваню Быкаву любоў да біятлону. Ён пастаянна вазіў пачынаючага спартсмена на рознага роду спаборніцтвы. «Мне радасна адзначыць, што Ваня – прызёр вобласці па біятлоне ў «Лыжных гонках». З ім прыемна працаваць. Усе пастаўленыя задачы выконвае, бо добра разумее, што залогам поспеху з’яўляецца мэтанакіраваная праца над сабой», — характарызуе свайго падапечнага Аляксандр Окунь.
Колькі пераможных стартаў было за ўсе гады трэніровак, пачынаючы спартсмен, не ведае. «Не лічыў, — сціпла адзначае. — Галоўнае не першае месца, а эмоцыі. Яны заўсёды станоўчыя. Спорт вучыць не толькі перамагаць, але і годна прымаць паражэнні». У пачатку кастрычніка Ваня Быкаў адстойваў гонар раёна ў рэспубліканскай спартакіядзе па летнім біятлоне сярод дзіцяча-юнацкіх спартыўных школ, якая праходзіла ў Наваполацкім вучылішчы алімпійскага рэзерву. Узровень падрыхтоўкі спартсменаў быў высокі. Прызёрам, праўда, юны сенненец не стаў. І гэта ніколькі не растроіла яго. «Мне было цікава ведаць, на што здольны я, — адзначае мой суразмоўца. – У годнага саперніка заўсёды ёсць чаму павучыцца».
Апроч біятлона Ваня яшчэ захапляецца і лёгкай атлетыкай. На пытанне, навошта нагружаць сябе такімі трэніроўкамі, Ваня адказвае проста: для мяне важна падтрымліваць фізічную актыўнасць. Прычым, настолькі важна, што Ваня не прапускае магчымасці, каб праверыць свае сілы ў рознага роду спаборніцтвах і часам нават зусім не юнацкіх. Вось, да прыкладу, у спаборніцтвах па лёгкаатлетычнаму шматбор’ю «Здароўе» сярод працоўных калектываў раёна, якія прайшлі ў верасні, прымаў удзел і Ваня Быкаў. Праўда, яго вынікі не ішлі ў залік яго каманды. Гэты вынік быў асабіста для мяне, гаварыў хлопец.
Спорт аказвае вялікі ўплыў на фарміраванне асобы, характару. Закладвае фундамент упэўненасці ў сабе. Жаданне быць здаровым, моцным – тая матывацыя, якая падштурхоўвае Ваню сёння рухацца наперад.
Ала ЯКАЎЛЕВА.
Фота аўтара.
