Он пишет стихи, играет на нескольких музыкальных инструментах, танцует — и это далеко не всё, чем увлекается Анатолий Любиев, ученик СШ №1 г.Сенно
Ён піша вершы, грае на некалькіх музычных інструментах, танцуе – і гэта далёка не поўны пералік захапленняў Анатолія Любіева, вучня 11 класа першай гарадской школы.
Артыстычнага маладога чалавека часта можна ўбачыць на раённай сцэне ў якасці спевака, танцора, музыканта. Ён паспявае вучыцца і штодзень наведваць раённы Цэнтр культуры і народнай творчасці, супрацоўнікі якога даюць магчымасць яму рэалізаваць свой творчы патэнцыял, накіраваць яго ў патрэбнае рэчышча.
Сенненшчына для маладога чалавека стала другой малой радзімай. Некалькі гадоў назад Любіевы прыехалі сюды з Украіны. Абуладкаваліся ў вёсцы Каралевічы. Анатолію, які рос у горадзе абласнога значэння, у Новай Кахоўцы, што ў Херсонскай вобласці, у першыя гады было складана прыняць рытм і магчымасці маленькага населенага пункта. Як прызнаўся малады чалавек, дапамагло тое, што ў райцэнтры ёсць дзіцячая школа мастацтваў. Яна і стала для яго аддушынай. Маці запісала яго ў харэаграфічны клас для далейшага прадаўжэння вучобы. Справа ў тым, што на радзіме ён займаўся танцамі, у музычнай школе вучыўся па класу бандуры (папулярны ўкраінскі народны інструмент). Выступаў нават у ансамблі бандурыстаў.
Анастасія Галынчык, выкладчыца танцаў, разгледзела ў маладым чалавеку талент, дапамагла асвоіцца. Менавіта яна пазнаёміла яго з беларускімі народнымі танцамі. “Безумоўна, мне спадабалася, — кажае Анатолій. – Цікава было вывучаць асаблівасці вашай танцавальнай спадчыны, тым больш, што на радзіме я доўгі час займаўся ўкраінскімі народнымі танцамі. Аднойчы, падчас танцавальнага конкурсу, з напарніцай сталі пераможцамі. Узнагародай для нас тады стала трохтыднёвая пуцёўка ў “Артэк”.
Анатолій змог заявіць пра сябе і на Сенненшчыне. У 2018 годзе ў турніры народных танцаў на фестывалі “Славянскім базар у Віцебску”, куды ён ездзіў у складзе клуба аматараў фальклору “Крывія” РЦКіНТ, у пары з Машай Кузмініч ва ўзроставай катэгорыі 15-16 гадоў занялі другое месца. А па выніках конкурснай праграмы ХІІІ абласнога агляду-конкурсу фальклорнага мастацтва дзяцей і моладзі, які на днях прайшоў у Расонах, заняў першае месца ў харэграфічнай імправізацыі. У парным танцы з Ліянай Макеенкавай таксама былі першымі.
Анатолій шматгранная асоба – валодае не толькі музыкальным, але і літаратурным талентам. Умее ўбачыць маленькае ў вялікім і прыгожа адлюстраваць рэчаіснасць, выкарыстоўваючы мастацтва слова. Яго вершы неаднаразова друкаваліся на старонках “Голасу Сенненшчыны”. З нядаўняга часу пачаў пісаць песні. Іх ужо ацанілі сенненцы, якія мелі магчымасць трапіць на выступленні моладзевага гурта “Арызона”, створанага пры РЦКіНТ, дзе Анатолій з’яўляецца гітарыстам і вакалістам.
Ён умее граць на барабанах, асвоіў трубу. Навыкі дапамаглі набыць у духавым аркестры.
Не за гарамі выпускны баль і ўступная кампанія. Анатолій ўжо вызначыўся, з чым звяжа сваё далейшае жыццё. Як прызнаўся хлопец, будзе спрабаваць паступаць у Беларускі дзяржаўны ўніверсітэт культуры і мастацтва на спецыяльнасць “рэжысура”. А пакуль нават у перапынках паміж рэпетыцыямі рыхтуецца да цэнтралізаванага тэсціравання.
Як адзначыла Вольга Берашэвіч, загадчыца аддзелам РЦКіНТ, супрацоўнікам Цэнтра, якім Анатолій дапамагае ў правядзенні розных мерапрыемстваў, прыемна бачыць, як ён імкнецца да творчага самаўдасканалення і развіцця. “Гэта будучая зорка беларускай сцэны, — асказала Вольга Уладзіміраўна. – Вось пабачыце, пра Анатолія Любіева мы яшчэ пачуем”.
Ала ЯКАЎЛЕВА.
Фота аўтара.
