Дзяжурны рэпарцёр
Грэйдэр у дэфіцыце, дарогі ў ямках
Аляксандр Чыжэўскі звярнуўся ў рэдакыю пасля таго, як у дыспетчарскай РУП ЖКГ яму катэгарычна заявілі, што праезная частка вуліцы ў пасёлку Льнозаводскі, пад’язная дарога да яго грэйдзіравацца не будуць. Маўляў, яны не стаяць на балансе прадпрыемства камунальнай гаспадаркі.
Дзяжурны рэпарцёр спачатку пачуў амаль такі ж адказ. Толькі пасля кантактаў з адказнымі асобамі больш высокага ўзроўню насілу ўдалося высветліць — названыя аб’екты ўсё ж уваходзяць у зону адказнасці камунальнікаў. Іншая справа, не маючы тэхнічных магчымасцей, каб весці догляд дарог з пясчана-гравійным пакрыццём, РУП ЖКГ звяртаецца па дапамогу да дарожнікаў.
— У ДРБУ-146 у рабочым стане толькі адзін грэйдэр. Таму нас папярэдзілі, што заяўкі будуць выкананы не так хутка, як хацелася б, — патлумачыў Мікалай Жукоўскі, галоўны інжынер Сенненскага РУП ЖКГ.
Да канца месяца
Па вуліцы Сінькевіча райцэнтра яшчэ вясной сувязісты замянілі паветраную лінію на падземны кабель, чым спадзяваліся палепшыць якасць сваіх паслуг. Мелі свае спадзяванні некаторыя жыхары вуліцы, у прыватнасці, Іван Шураеў, які мае дагавор з Сенненскім вузлом электрасувязі на ўстаноўку хатняга тэлефона.
— Згодна з дакументам заплаціў грошы, спадзеючыся падключыць тэлефонны апарат да лініі яшчэ летам. Аднак мае спадзяванні не спраўдзіліся. Сувязісты, колькі да іх не звяртаўся, тлумачылі, што ў іх работы цераз край. Трываў, пакуль аднойчы не глянуў на каляндар — дык ужо восень канчаецца, — бедаваў Іван Дзянісавіч.
Кіраўнік Сенненскага РВЭС Сяргей Касьянаў прызнаўся — вінаватыя. Па яго словах, шмат часу займае ліквідацыя парываў на лініях электрасувязі, якія здараюцца штодня, а таму планава работу па расшырэнні абанентскай сеткі весці не ўдаецца.
— Але мы выправімся. Тэлефоны не падключаюцца да лініі, бо старая частка кабелю па вуліцы Сінькевіча патрабуе рамонту. Зробім і да канца месяца падключым усіх абанентаў, — паабяцаў кіраўнік прадпрыемства.
Для каго лазня ёсць, для каго няма
Другі раз за лістапад у рэдакцыю звяртаецца Арнольд Зайцаў, які жыве ў Маргойцах Беліцкага сельсавета. Ён лічыць, што Беліцы патрэбна грамадская лазня.
— Як гэта так, каб на ўсю ваколіцу не было ні адной грамадскай лазні? — не сунімаецца ён. А таму звярнуўся на гэты раз і да нас, і ў рэдакцыю “Віцебскага рабочага”.
— А навошта грамадская, калі ёсць уласная, — дзівяцца тыя вяскоўцы, якія маюць лазню на ўласным падворку. У Беліцкім сельскім Савеце зноў спасылаюцца на сацыяльныя стандарты. Згодна з імі лазняў ва ўсіх населеных пунктах сельсавета хапае. Яшчэ адным аргументам не на карысць будаўніцтва грамадскай лазні з’яўляецца эканамічная немэтазгоднасць яе эксплуатацыі. Ды і сродкаў на гэтыя мэты ні ў выканкаме мясцовага Савета дэпутатаў, ні ў КУСГП “Полымя” няма.
“Правядзём сходы, тады прымем рашэнне”
З Янова да нас звярнулася жанчына, якая сваё прозвішча называць не захацела. Яе цікавіла, ці будзе закрывацца вясковы малакапрыёмны пункт?
Як удалося нам высветліць, малакапрыёмнага пункта ў Янове ніколі не было. Няма яго і цяпер. Ёсць лабараторыя на МТФ СВК “Бяленева”, куды звозіцца малако з іншых ферм сельгаскааператыва, дастаўляюць сабраную ў насельніцтва прадукцыю малаказборшчыкі. Частка яноўцаў нясе туды ўласнае малако самастойна, каб мець дакладную інфармацыю пра яго якасць. У гэтым сэнсе ніякіх змен не чакаецца.
Магчымы, праўда, іншыя. Але адбудуцца яны пасля таго, як у вёсцы пройдзе сход з малаказдатчыкамі і на ім на змены будзе атрымана згода. Справа ў тым, што ў суседніх вёсках, Какоўчыне, Літусаве, зборам малака займаецца індывідуальны прадпрымальнік. Па інфармацыі, атрыманай ад старшыні Какоўчынскага сельскага Савета дэпутатаў Уладзіміра Мурашкі, жыхары названых вёсак работай прыватнай асобы задаволены. Ніякіх збояў у рабоце прадпрымальніка за апошні час не было, прэтэнзій да вызначэння тлустасці, іншых якасных параметраў таксама. Чаго не скажаш пра работу малаказборшчыкаў СВК “Бяленева”. У нядзелю малако часта не збіраецца зусім. У іншыя дні колькасць яго прыкметна вагаецца.
Як заўважыў старшыня райсавета Міхаіл Вілюга, для СВК “Бяленева” збор малака — толькі адзін з відаў дзейнасці, для прадпрымальніка — асноўны спосаб атрымання даходаў.
Аляксандр Лазюк.
Тэлефануйце 4-88-54. Вас выслухае Таццяна Віктараўна Буракова.