1 декабря — Всемирный день борьбы со СПИДом. Как узнать свой ВИЧ-статус?
Штогод 1 снежня ў большасці краін свету адзначаецца дзень барацьбы са СНІДам. Гэта дата — нагода для таго, каб яшчэ раз усвядоміць маштаб распаўсюджвання захворвання, — адзначае памочнік урача-эпідэміёлага ДУ «Сенненскі РЦГЭ» Жанна Гаравая. — Асабліва на фоне сітуацыі ў Пермскім краі Расіі, дзе недалёка да эпідэміі, а ў Екацерынбургу ўвогуле абвясцілі эпідэмію. Па афіцыйных дадзеных у сталіцы Урала ВІЧ-інфіцыяваны кожны 50-ты жыхар.
На Віцебшчыне найбольш неспрыяльнае становішча па стане на 1 лістапада 2016 года назіралася ў Полацкім (187 выпадкаў ВІЧ-інфекцыі), Талачынскім (66), Лёзненскім (57), Віцебскім (46), Гарадоцкім (41), Бешанковіцкім (19), Дубровенскім (19) раёнах. У абласным цэнтры зарэгістравана 385 выпадкаў ВІЧ-інфекцыі.
У Сенненскім раёне зафіксавана 12 выпадкаў ВІЧ-інфекцыі, у тым ліку 2 з іх былі выяўлены ў бягучым годзе. На райцэнтр прыходзіцца 5 выпадкаў ВІЧ-інфекцыі. Таксама зарэгістраваны 1 выпадак ВІЧ-інфекцыі ў цяжарнай жанчыны.
Статыстыка яскрава сведчыць, што праблема СНІДу не зніжае сваёй вастрыні. Адзіным сродкам засцерагчыся ад смяротнай хваробы па-ранейшаму застаецца прафілактыка.
Урач-кардыёлаг УЗ «Сенненская ЦРБ» Вольга Васілёнак.
— Пазбегнуць хваробы можна дасканала ведаючы пра шляхі заражэння.
Фактарамі рызыкі з’яўляюцца пазашлюбныя палавыя сувязі, ужыванне наркотыкаў, а яшчэ — нанясенне татуіровак, выкарыстанне агульных прыбораў для галення, манікюрных і іншых прадметаў асабістай гігіены, на што, на жаль, большасць насельніцтва мала звяртае ўвагу.
Вялікую групу сярод хворых на СНІД і носьбітаў ВІЧ складаюць наркаманы.
ВІЧ не перадаецца пры звычайных зносінах з інфіцыяванымі людзьмі. Заразіцца СНІДам немагчыма пры доглядзе за хворым, знаходжанні з ім у адным памяшканні, пацісканні рукі, абдымках і сяброўскіх пацалунках, пры яго кашлі і чыханні, карыстанні грамадскім тэлефонам, душам, туалетам і плавальным басейнам, выкарыстанні прадметаў хатняга ўжытку.
Калі мы гаворым пра ВІЧ-інфекцыю, то дзейсным метадам прафілактыкі з’яўляецца здаровы лад жыцця. Ён уключае ў сябе захаванне правілаў асабістай гігіены, заняткі фізічнай культурай, правільнае харчаванне, устрыманне ад ужывання алкаголю, тытуню, наркотыкаў, уменне спраўляцца з рознымі перажываннямі і стрэсамі.
Ад хваробы ніхто не застрахаваны. Нельга з упэўненасцю сцвярджаць, што праблема СНІДу не закране цябе або тваіх блізкіх. Таму патрэбна добра ведаць усе аспекты захворвання.
Святлана Станулевіч, намеснік дырэктара па выхаваўчай рабоце Студзёнкаўскай школы.
— Штогод да сусветнага дня барацьбы са СНІДам у нашай школе арганізуюцца тэматычныя акцыі і мерапрыемствы. Праводзяцца ўрокі здаровага ладу жыцця, накіраваныя на прафілактыку СНІДу, анкетаванне, прагляд тэматычных відэафільмаў, сустрэчы з работнікам ФАПа на тэму «Задай пытанне аб ВІЧ». Традыцыйным мерапрыемствам стаў агляд-конкурс плакатаў і малюнкаў «Моладзь супраць СНІДу».
Веды пра небяспечны вірус імкнёмся даваць праз гутаркі, конкурсы, віктарыны.
Праверце сябе
на СНІД
Ранняе выяўленне і своечасовае назначэнне лячэння з’яўляюцца дзейснай мерай у барацьбе з захворваннем.
Даведацца пра свой ВІЧ-статус можна, здаўшы спецыяльны тэст.
Прайсці абследаванне, у тым ліку ананімнае, можна ў працэдурным кабінеце раённай паліклінікі. Вам выдадуць картку, на якой з аднаго боку пазначаны нумар тэлефона працэдурнага кабінета, а з другога — нумар аналізу і дата яго здачы. Але, як паведамілі ў медыцынскай установе, ахвотных ананімна здаць аналіз на ВІЧ/СНІД у бягучым годзе не знайшлося, як не было іх і ў мінулым годзе.
Ларыса МУКАМОЛАВА.