“Жалезныя” хлопцы памерыліся сіламі
Раённы турнір па класічным рускім жыме прайшоў у фізкультурна-спартыўным комлексе райцэнтра. Памерацца сілай сабраліся 10 аматараў сілавога шматбор’я з Сянна і Багушэўска. Арганізатарам спаборніцтваў выступіў аддзел адукацыі, спорту і турызму райвыканкама.
Рускі жым — дастакова малады і відовішчны від спорту. Першыя спаборніцтвы па шматпаўторным жыме штангі вагой 55 кг былі праведзены ў 2000 годзе ў Расіі. Зараз рускі жым канчаткова сфармаваўся ў паўнавартасную дысцыпліну. У Беларусі ён мае зацверджаны рэгламент і ўласную федэрацыю.
Гэты від цяжкай ат- летыкі ўключае ў сябе адно практыкаванне — жым штангі лежачы ад грудзей на гарызантальнай лаўцы. Задача спартсмена ў тым, каб падняць снарад пэўнай вагі як мага больш разоў. Нягледзячы на тое, што падыход доўжыцца 5 хвілін, як правіла, арганізм траціць энергію за мінуту. Потым адчуваюцца наймацнейшая стомленасць і мышачны боль. Таму падчас выканання падыходу атлетам даецца магчымасць двойчы ўзяць адпачынак-паўзу, але штанга пры гэтым павінна ляжаць на грудзях спартсмена. Перамагаюць тут далёка не заўсёды самыя дужыя і «накачаныя». У рускім жыме важная сукупнасць сілы і вынослівасці. Лідар вызначаецца па каэфіцыенце атлетызму, г.зн. колькасць здзейсненых жымаў памнажаецца на вагу штангі і дзеліцца на ўласную вагу спартсмена.
У час спаборніцтваў усе ўдзельнікі турніру імкнуліся да максімальнай колькасці паўтораў. Лёгка не было нікому. Хтосьці падтрымліваў сябе голасам, кагосьці падбадзёрвала група падтрымкі з ліку калег, сяброў.
19-гадовы Улад Калуханаў — самы малады ўдзельнік спаборніцтваў, паспрабаваць сябе ў рускім жыме вызваўся непасрэдна перад пачаткам турніру. Маладосць і адсутнасць практыкі не дазволілі Уладу трапіць у лік прэтэндэнтаў на перамогу. Але, па яго словах, важны ўдзел, а вопыт прыйдзе з гадамі і трэніроўкамі.
Наймацнейшым стаў Васіль Мурашка — штанга вагой 55 кг скарылася яму 78 разоў. На другім і трэцім месцах размясціліся Максім Янукоў з Багушэўска і Сяргей Гарбачоў з Сянна. Пераможцы і прызёры адкрытага раённага турніру па рускім жыме былі адзначаны дыпломамі.
Вольга БАНДАРЭВІЧ.