Героі «Дажынак — 2010»
Вячаслаў Мікалаевіч Міхалёнак, вадзіцель ААТ «Сенненскі райаграсервіс» (на здымку), заняў першае месца ў рэспубліканскім спаборніцтве сёлетняга года па нарыхтоўцы кармоў. На сваім магутным МАЗе перавёз каля 9 тысяч тон зялёнай масы і стаў удзельнікамсвята «Дажынкі-2010» у г.Ліда. Там Вячаслаў Мікалаевіч атрымаў Дыплом першай ступені. Не лішняй рэччу ў хатняй гаспадарцы будзе і халадзільнік, які таксама падарылі пераможцу.
Быць вадзіцелем Вячаслаў Міхалёнак не збіраўся. У юнацтве перад ім адкрывалася зусім іншаядарога. Пасля заканчэння 7 класаў другой сенненскай школы хлопец быў залічаны ў віцебскую школу-інтэрнат спартыўнага профілю, якая тады пачала працаваць (цяпер — вучылішча алімпійскага рэзерву). У час вучобы паказваў нядрэнныя спартыўныя рэзультаты па лёгкай атлетыцы. Быў членам юнацкай зборнай Бларусі, а некаторы час — і Саюза. Але жыццё склалася так, што спорт давялося пакінуць. Потым была служба ў войсках ППА Ленінградскай ваеннай акругі. Калі адслужыў і вярнуўся дадому, паступіў у Сенненскую друкарню вучнем друкара. Але хутка зразумеў, што гэты занятак не для яго.
Пасля вучобы ў аўташколе па накіраванні аўтапрадпрыемства №20 атрымаў правы вадзіцеля. Працаваў на Сенненскім заводзе сухога абястлушчанага малака, у сельгастэхніцы, на прадпрыемстве «Астра», якое было калісьці створана ў калгасе «1 Мая», у сельгасхіміі. Пасля яе аб’яднання з сельгастэхнікай працуе ў райаграсервісе.
У час «Дажынак» у Лідзе, гаворыць Вячаслаў Мікалаевіч, асабліва крануў за душу момант, калі ішлі па вуліцах у калонах, а людзі віталі з непадробнай сардэчнасцю і шчыра апладзіравалі. Гэтыя добразычлівыя адносіны і разуменне таго, што добрая праца ў нашай краіне цэніцца і паважаецца не на словах, а на справе, даюць стымул і сілы для новых дасягненняў і перамог.
Таццяна Буракова.