У госці да сенненскай Паўлінкі
Настаўнікі СШ №2 г.Сянно пабывалі на паказе спектакля «Паўлінка» ў Нацыянальным драматычным тэатры імя Янкі Купалы ў Мінску.
Для сенненцаў нядаўні візіт стаў асабліва запамінальным. У гэты дзень на галоўных падмостках краіны ў ролі Паўлінкі выступала колішняя выпускніца школы, ураджэнка Сянна, а цяпер вядучая актрыса праслаўленай купалаўскай сцэны Кацярына Алейнікава.
Яркую ігру зямлячкі сенненскія тэатралы ацанілі шчырымі апладысментамі. Але прыемны сюрпрыз іх чакаў пасля спектакля, калі актрыса запрасіла сенненцаў за кулісы. Настаўнікі пабывалі ў грымёрцы, пагутарылі з зямлячкай. Па прызнанні самой Кацярыны, ведаючы, што ў зале прысутнічаюць яе былыя настаўнікі, яна іграла з вялікім хваляваннем і адказнасцю.
На памяць пра сустрэчу з зоркай сцэны засталіся сумесныя фотаздымкі і аўтографы.
Паездка стала магчымай дзякуючы падтрымцы раённага камітэта прафсаюза работнікаў адукацыі і навукі, які ўзяў на сябе транспартныя выдаткі. Аўтобус на гэтыя мэты выдзеліла ДРБУ-146.
Наш кар.
На здымку: удзельнікі паездкі і наша Паўлінка — Кацярына Алейнікава.