На базе Сенненскай сярэдняй школы №1 прайшоў злёт-конкурс атрадаў юных інспектараў дарожнага руху
Спаборніцтва арганізавана АДАІ Сенненскага РАУС і аддзелам адукацыі, спорту і турызму райвыканкама.
У ім прынялі ўдзел 9 каманд, якія складаліся з падлеткаў ва ўзросце ад 10 да 15 гадоў.
Арганізатары мерапрыемства ўпэўнены, што яно спрыяе не толькі прафілактыцы дзіцячага дарожна-транспартнага траўматызму, але і выхоўвае законапаслухмяных удзельнікаў дарожнага руху.
Камандам трэба было прайсці некалькі складаных конкурсаў. У тэарэтычных іспытах патрабавалася паказаць веданні Правілаў дарожнага руху, асноў першай медыцынскай дапамогі. Самым цікавым выдалася спаборніцтва «Фігурнае ваджэнне веласіпеда». Канкурсанты, віртуозна пераадольваючы перашкоды, дэманстравалі клас язды на двухколавым транспартным сродку. Свой творчы патэнцыял і тэатральныя таленты дзецям прапанавалася раскрыць у агітацыйна-мастацкім прадстаўленні, а таксама ў конкурсе сценгазет.
Па выніках спаборніцтва трэцяе месца заняла каманда з Нямойтаўскай дзіцячага сада-базавай школы. Другімі сталі навучэнцы Сенненскай СШ №1.
Ганаровае першае месца дасталося атраду юных інспектараў дарожнага руху Багданаўскай сярэдняй школы.
Каманды-пераможцы былі ўзнагароджаны граматамі і памятнымі падарункамі. Дапамогу ў іх набыцці аказалі аддзел па ідэалагічнай рабоце, культуры і па справах моладзі райвыканкама, РУП ЖКГ, ПМК-64, ПУП «Дружбінец».
Ала ЯКАЎЛЕВА.
