Лепшыя ў сувязі
Перасовачнае аддзяленне сувязі №1 абслугоўвае 15 вёсак. Пошту развозіць вадзіцель Міхаіл Пятровіч Кучынскі. Разам з ім у дарогу кожны дзень адпраўляецца начальнік аддзялення Алена Уладзіміраўна Магера. Па сутнасці яны з’яўляюцца тым звяном, якое яднае вяскоўцаў і грамадства. Дастаўляюць не толькі пенсіі і перыёдыку, але і тавары першай неабходнасці. Акрамя гэтага прымаюць плацяжы на даму (за тэлефон, радыё, электраэнергію, камунальныя паслугі і г.д.). Старыя з аддаленых вёсак просяць лекі ў аптэцы купіць — не адмаўляюць, дапамагаюць вяскоўцам.
Пра добрасумленныя адносіны да сваёй справы Міхаіла Кучынскага і Алены Магера ў рэдакцыю райгазеты паведамілі жыхары вёскі Заслонаўка Елізавета Сяргееўна Ціханкова, Галіна Фёдараўна Хмялькова і жыхарка в. Леснікова Валянціна Аляксандраўна Румо.
— Гэта адзін з лепшых нашых экіпажаў, — адзначае намеснік начальніка РВПС Святлана Віктараўна Старавойтава. — Міхаіл Пятровіч плённапрацуе ў сувязі з 1993 года, а ўся працоўная дзейнасць Алены Уладзіміраўны звязана з паштовай сувяззю (спачатку давала водпускі аператарам, працавала начальнікам аддзялення сувязі ў вёсцы Папоўка, а са снежня 2008 года — начальнік перасовачнага аддзялення сувязі). Планавыя заданні экіпаж заўсёды выконвае, а гэта важнейшая характарыстыка іх дзелавой актыўнасці.
Жыццё не стаіць на месцы. Таму забеспячэнне вяскоўцаў самымі рознымі відамі паслуг — абавязак паштавікоў, які яны выконваюць якасна і дастойна.
Ларыса
Мукамолава.
На здымку: начальнік перасовачнага аддзялення сувязі № 1 Алена Магера і вадзіцель Міхаіл Кучынскі.