Урок-падарожжа па роднай зямлі
Зноў восень запрасіла дзяцей у школу. У новым навучальным годзе Міністэрства адукацыі Рэспублікі Беларусь прапанавала правесці ў агульнаадукацыйных установах урок, прысвечаны грамадзянскаму і патрыятычнаму выхаванню, па тэме «Беларусь — краіна маёй будучыні».
1 верасня бібліятэка гарадскога пасёлка Багушэўск гасцінна адчыніла дзверы для вучняў 3 «А» класа (класны кіраўнік Таццяна Пятроўна Зайко), 4 «А» класа (класны кіраўнік Ларыса Дзмітрыеўна Аўчыннікава), 5 «Б» класа (класны кіраўнік Інга Віктараўна Глебава).
У ролі настаўнікаў для вучняў выступілі бібліятэкары Лідзія Фёдараўна Драздова і Жанна Яўгенаўна Цуран.
Урок-падарожжа «Давай ганарыцца, што мы — беларусы» распачала Лідзія Фёдараўна Драздова. Першая старонка падарожжа заклікала дзяцей асэнсаваць лексічнае значэнне назвы Радзімы, усвядоміць, хто такія беларусы.
Прадоўжыла падарожжа па гістарычным летапісу роднай зямлі Жанна Яўгенаўна, якая пранікнёна прадэкламавала ва ўступным слове верш Івана Лазукі «Багушэўск».
130 год прайшло з дня заснавання гарадскога пасёлка Багушэўск. Колькі цікавых падзей адбылося за гэты час! Колькі знакамітых людзей нарадзілася і жыло ў гэтым маляўнічым кутку.
Трэцяя старонка падарожжа для дзяцей была не менш цікавая, чым папярэднія, — сустрэча з творчым чалавекам, паэтам, кампазітарам (аўтарам слоў і музыкі гімна г.п. Багушэўск, песні «Багушэўскі вальс»), выканаўцам, кіраўніком гурта «Медуніца» пры Доме культуры Палінай Сяргееўнай Пядачкінай.
У шкло бібліятэкі стукалі халодныя кроплі дажджу, гудзеў асенні вецер, але вучні не заўважалі, бо былі ў «палоне» вершаванай легенды пра Лысую гару вёскі Магілёўка.
Вельмі развесяліла рабят байка «На рыбалцы» пра сяброўку Паліны Сцяпанаўны. Пры чытанні верша пра лес слухачам было прапанавана закрыць вочы і ўявіць свой мілы сэрцу куточак.
Змястоўнымі і цікавымі атрымаліся першыя заняткі для пачаткоўцаў. У выніку такой работы дзеці атрымалі ўрок дабрыні, справядлівасці, чуласці. Была закладзена цаглінка ў падмурак адказнасці за свае ўчынкі, пачуцця любові і павагі да Беларусі, гонару за родны край, прывіцця цікавасці да гісторыі Бацькаўшчыны.