Свята роднай старонкі
Багушэўск адзначыў сваё 134-годдзе.
У той дзень у гарадскім пасёлку было надзвычайна шумна і людна. Нават па-асенняму халоднае, даждлівае надвор’е не сапсавала настрой яго жыхарам і гасцям. Усе ішлі на свята дружна і весела. «Сустракалі» людзей палаткі Сенненскага райспажыўтаварыства, прыватныя атракцыёны для маленькіх і дарослых. Неафіцыйны гімн Багушэўска ў выкананні вакальнай групы ДШМ і фальклорнага калектыву «Макавея» распачаў святочнае мерапрыемства. Дарэчы, аўтар слоў і музыкі «Багушэўскага вальса», мастацкі кіраўнік Багушэўскага Дома культуры, Паліна Пядачкіна, стала сцэнарыстам і рэжысёрам свята.
У сувязі з умовамі надвор’я праграму мерапрыемства давялося змяніць. Напачатку экіпаж 50-й змешанай авіяцыйнай базы Ваенна-паветраных Сіл і войскаў проціпаветранай абароны Узброеных Сіл Рэспублікі Беларусь, што базіруецца пад Мінскам у Мачулішчах, над стадыёнам багушэўскай другой школы выканаў беспарашутнае дэсантаванне выратавальнай групы. Скачкі на малой вышыні дэсантнікі рабілі са шматмэтавага транспартна-баявога верталёта МІ-8, які стаіць на ўзбраенні ў многіх краінах свету.
Сваю святочную праграму паказалі іншыя госці — артысты калектыву мастацкай самадзейнасці Бешанковіцкага Дома культуры.
У час мерапрыемства ўзгадвалі значныя факты, падзеі, што адбыліся ў Багушэўску на працягу бягучага года.
Багушэўск папоўніўся 15 маленькімі жыхарамі. Васіль і Раіса Александровы адсвяткавалі «залаты» юбілей сумеснага жыцця. Яны выгадавалі і выхавалі дзесяцярых дзяцей. «Залатое» вяселле ў гэтым годзе адзначылі таксама Генадзь і Валянціна Бондаравы, Леанід і Людміла Кліманавы. Сярод «сярэбраных» юбіляраў — Галіна і Іван Секачовы, Уладзімір і Лідзія Яўменавы, Рыгор і Алена Лысенка, Анатоль і Алена Андрэевы, Анатоль і Алена Волкавы, Аляксей і Ганна Кордавы і інш. Сёлета ў пасёлку ўжо зарэгістравалі шлюб сем маладых пар. Не забыліся на тых, хто ў гэтым годзе пайшоў на заслужаны адпачынак.
Узгадалі старажылаў: 90-гадовыя юбілеі Ганны Чачэрынай і Аляксандры Хаджаевай, васьмідзесяцігоддзе Уладзіміра Мацюшкі, а таксама людзей, што маюць 40-гадовы працоўны стаж.
За 134 гады на багушэўскай зямлі адбылося нямала гістарычных падзей. Самым значным выпрабаваннем для багушэўцаў стала Вялікая Айчынная вайна. Таму на свяце гарпасёлка віншавалі ветэранаў вайны, ім прысвячалі вершы і песні.
Асабліва цёпла землякі сустракалі душэўныя песні Андрэя Голубева, працаўніка Багушэўскага лясгасу, Ларысы Аўчыннікавай, настаўніцы Багушэўскай СШ №1, і Таццяны Зайко, настаўніцы Яноўскай школы.
Што казаць, багушэўцы па-сапраўднаму трапятліва ставяцца да сваёй роднай старонкі, шчыра любяць і паважаюць мінулае, сваіх землякоў-ветэранаў, робяць усё магчымае, каб пасёлак жыў і развіваўся.
Завяршыліся ўрачыстасці ў Багушэўску дыскатэкай і маляўнічым феерверкам.
Ірына ГАРБАЧОВА.
Фота Андрэя МУРАШЭВІЧА.