Слабае звяно выявіў “Хаўер”
За мінулыя пятніцу і суботу снежны покрыў у Сенненскім раёне павялічыўся на 21 сантыметр і дасягнуў амаль паўметра. Снег суправаджаўся моцным парывістым ветрам, які, на шчасце, усё ж не дасягнуў штармавой сілы, аб чым напярэдадні папярэджанне ад сіноптыкаў атрымалі дарожныя і камунальныя службы, міліцыя, выратавальнікі, органы ўлады. Праз раённае радыё неабходная інфармацыя была даведзна да насельніцтва. Каб супрацьстаяць цыклону «Хаўер», ва ўсіх адміністрацыйных адзінках Беларусі, у тым ліку ў Сенненскім раёне, былі створаны надзвычайныя штабы. У Сенненскім райвыканкаме падобнае фарміраванне ўзначаліў намеснік старшыні райвыканкама Сяргей Пракаповіч.
Ускладненні ў рабоце аўтатранспарту пачаліся ўжо днём у пятніцу. А вечарам міжгароднія і прыгарадныя рэйсавыя аўтобусы на аўтастанцыю Сянно прыбывалі ўжо са спазненнем. Некаторыя аўтобусы давялося вызваляць са снежнага палону з дапамогай снегаачышчальнай спецтэхнікі. Дапамога вадзіцелям патрабавалася не толькі на дарогах рэспубліканскага і мясцовага значэння. Некалькі разоў па выкліку на М-8 выязджалі аўтамабілі Сенненскага раённага аддзела па надзвычайных сітуацыях. Нягледзячы на значную працягласць дарог, ДЭУ-38 і ДРСУ-146 ва ўстаноўленыя тэрміны забяспечылі расчыстку магістралей. Адначасова дапамагалі камунальнікам. Праезная частка транзітных вуліц Сянна і Багушэўска ад снегу была расчышчана фактычна тэхнікай дарожнікаў, будаўнічых арганізацый. Каб не яна, у Сянне, ва ўсякім разе, яшчэ доўга быў бы паралізаваны нават пешаходны рух. У суботу жыхары райцэнтра па тратуарах прайсці не маглі і перамяшчаліся па горадзе толькі па праезнай частцы вуліц. Што не засталося па-за ўвагай спецыялістаў раённага цэнтра гігіены і эпідэміялогіі, супрацоўнікаў дзяржаўтаінспекцыі. На адказных асоб РУП ЖКГ складзены адміністрацыйныя пратаколы. Зрэшты, частка тратуараў, двароў заставалася нерасчышчанай нават у аўторак, сераду.
Камунальнікі, як звычайна, спасылаюцца на недахоп тэхнікі. Але, на думку Сяргея Пракаповіча, якую ён выказаў на нарадзе ў старшыні райвыканкама, неразваротлівасць сведчыць аб дрэннай арганізацыі працы, нізкім кантролі за работай службаў з боку кіраўніцтва прадпрыемства.
У Багушэўску значны аб’ём работ па расчыстцы вуліц ад снегу выканала тэхніка лясгаса і леспрамгаса, у сельскіх населеных пунктах — сельгасарганізацый. У выніку значных збояў у рабоце аўталавак, машын «хуткай дапамогі» не зафіксавана. Устойліва працавалі лініі электраперадач. Невялікія адключэнні мелі месца, але яны ўхіляліся ва ўстаноўленыя тэрміны.
Трэба аддаць належнае вытрымцы жыхароў раёна. Абсалютная большасць да часовых цяжкасцей паставілася з разуменнем, многія ўзяліся за лапаты па ўласнай ініцыятыве, каб расчысціць снег ля пад’ездаў, выезды з двароў.
Аляксандр ЯЎГЕНАЎ.