Сенненскі музей запрашае на “Навагоднія вечары”. Замест білета — ёлачная цацка!
У розныя часы на тэрыторыі Беларусі Новы год адзначалі ў розныя даты. І перш чым традыцыя святкаваць Новы год замацавалася за 1 студзеня, было, мякка кажучы, «сломано немало копий». Звязана гэта з наяўнасцю на нашых землях мноства рэлігійных канфесій, а таксама вялікім уплывам старажытных народных традыцый.
У гістарычнай літаратуры ўпамінаюцца ажно шэсць святочных дат Новага года. У тым ліку адзначалі яго і на Купалле.
У другой палове XVI века на тэрыторыі Вялікага княства Літоўскага засталіся тры варыянты пачатку адліку новага года: 1 студзеня (яго адзначалі каталікі і пратэстанты), 1 верасня (праваслаўныя) і 1 сакавіка (паганцы). Дарэчы, сакавіцкі стыль паступова ператварыўся ў народны абрад «гуканне вясны».
Прынята звязваць пераход да адзінай даты з указам Пятра I, датаваным 1700 годам. Аднак на той час мы жылі ў іншай краіне. Распаўсюджванню традыцый святкавання 1 студзеня ў Беларусі садзейнічаў зусім не загад расійскага цара, а ўзнікненне ўніяцкай царквы ў канцы XVI стагоддзя.
У другой палове XIX — пачатку XX стагоддзя паступова распаўсюдзіўся звычай ставіць ёлку. Спачатку яна з’явілася ў дамах выключна заможных людзей. Сярод беларускіх сялян, рамеснікаў, рабочых гэты звычай прыжыўся значна пазней.
З часам адбыліся змены ў складзе навагодніх персанажаў. У XX стагоддзі ў Беларусі, як у большасці еўрапейскіх краін, галоўным героем навагодніх святаў стаў Дзед Мароз…
Некалькі тыдняў засталося да Новага, 2013, года. Але ў паветры, у вачах людзей, у размовах родных і сяброў, у вітрынах магазінаў Новы год ужо жыве поўным жыццём. Для самых нецярплівых, для тых, каму ўжо хочацца адзначаць навагоднія святы, для ўсіх наведвальнікаў Сенненскі гісторыка-краязнаўчы музей падрыхтаваў цыкл мерапрыемстваў «Навагоднія вечары ў музеі».
21 снежня ў 16 гадзін у музеі адбудзецца адкрыццё навагодняй праграмы. Уваходным білетам стане ўдзел у акцыі «Падары музею цацку». Вы можаце прыносіць навагоднія цацкі і паштоўкі савецкіх часоў, а мо (калі ёсць) і ранейшага перыяду.
Прыходзьце, калі ласка, будзе цікава! Музей чакае ўсіх!
