Сенненскія “совы” адсвяткавалі 60-годдзе з дня ўтварэння ахоўнай службы
Знакавай датай для ахоўнікаў з’яўляецца 29 кастрычніка 1952 года, калі Савет Міністраў СССР прыняў адпаведную пастанову. У Сянне ўпершыню ахова аб’ектаў была арганізавана ад аддзела міліцэйскай службы Аршанскага гарадскога аддзела міліцыі ў 1959 годзе. 1 ліпеня 1967 года створана аддзяленне пазаведамаснай аховы пры раённым аддзяленні ўнутраных спраў Сенненскага райвыканкама. Сучасную назву — Сенненскае аддзяленне Дэпартамента аховы МУС Рэспублікі Беларусь — установа атрымала ў лютым 2004 года.
У наш час аддзяленне — гэта зладжаны, тэхнічна аснашчаны і аператыўны механізм, які гарантуе надзейную абарону аб’ектаў, у тым ліку, кватэр ад злачынных замахаў. Сучасныя сродкі ахоўнай сігналізацыі, мабільнасць групы затрымання, яе аснашчанасць тэхнікай і ўзбраеннем дазваляюць у поўнай меры забяспечваць выкананне дагаворных абавязацельстваў па ахове маёмасці, а таксама папярэджваць і раскрываць правапарушэнні на пастах і маршрутах патрулявання, падтрымліваць грамадскі парадак.
Сваю небяспечную і вельмі патрэбную варту супрацоўнікі аддзялення нясуць кругласутачна. Вось і на святочнае мерапрыемства з нагоды юбілею, што прайшло ў сценах аддзялення, патрапілі не ўсе. Служба — на першым месцы.
Асаблівыя словы падзякі ў сваім віншавальным выступленні выконваючы абавязкі начальніка аддзялення, капітан міліцыі Аляксандр Дунец адрасаваў ветэранам службы, якіх нямала прысутнічала ў зале.
Хвілінай маўчання ўшанавалі памяць тых, хто не дажыў да сённяшняга юбілею. Назаўсёды ў памяці застануцца імёны А.Д.Бышчава, М.А.Лукашэвіча, М.А.Падалінскага, І.У.Камандышкі, В.В.Паўлоўскага.
Але жыццё працягваецца і калектыў аддзялення папаўняецца новымі маладымі кадрамі. Толькі ў гэтым годзе яго рады папоўнілі 10 супрацоўнікаў.
На ўрачыстым мерапрыемстве траім навічкам ахоўнай службы — міліцыянерам ўзвода міліцыі Таццяне Ходас, Максіму Багдановічу і міліцыянеру-вадзіцелю групы затрымання Уладзіславу Таукчы — ветэран унутранай службы Пётр Стычынскі ўручыў табельную зброю. Нагруднымі знакамі «За самаадданую службу» і «За адзнаку» ўзнагароджаны міліцыянер-вадзіцель Юрый Гарбачоў і міліцыянер-кінолаг Яўген Караткевіч. Шэраг супрацоўнікаў за добрасумленную службу заахвочаны граматамі.
Агульным падарункам для ўсіх стаў канцэрт выхаванцаў гурткоў «Вакал» і «Вакаліна», падрыхтаваны раённым цэнтрам дзяцей і моладзі. Сваю лепту ў яго ўнеслі і самі ахоўнікі. Уладзімір Скакун павіншаваў саслужыўцаў беларускай гумарэскай.
Вольга БАНДАРЭВІЧ.