Дзе адрамантаваць аўто ў Сянно?
У рэдакцыю звярнулася жанчына-вадзіцель з просьбай па-магчымасці расказаць на старонках газеты, дзе ў нашым горадзе можна адрамантаваць аўтамабіль. Сапраўды, пытанне надзённае, бо ў апошні час у райцэнтры значна павялічылася колькасць уладальнікаў машын. Як сцвярджала Таццяна, так назвалася тэлефанаваўшая, складваецца такое ўражанне, што апроч замены шын ніякіх паслуг больш ніхто не аказвае. Няўжо, каб паглядзець, што «барахліць» унутры, альбо замяніць машыннае масла, трэба ехаць у сэрвісныя цэнтры ў Віцебск?
Мы паспрабавалі разабрацца ў дадзеным пытанні. Як высветлілася, аказаннем паслуг па рамонце аўтамабіляў у горадзе займаюцца прыватныя і дзяржаўныя прадпрыемствы.
Напрыклад, робяць камп’ютарную дыягностыку электронных сістэм кіравання па вуліцы Чырвонаармейскай — «Шынамантаж і дыягностыка». Тут толькі выяўляюць няспраўнасць. А вось на прыватным прадпрыемстве «Сянно-сэрвіс» спектр прапаноўваемых работ значна шырэйшы. Спецыялісты разбяруцца ў няспраўнасцях матора, а таксама могуць правесці зварачныя, зімой, фарбавальныя работы, замяніць масла, адрамантаваць падвеску і многае іншае. Звярнуўшыся на шынамантаж у аўтатранспартнае прадпрыемства №20, можна вырашыць пытанні, звязаныя з коламі аўто. А ў сенненскай дыягнастычнай станцыі, якая па аснашчанасці навейшым абсталяваннем лепшая ў вобласці, не толькі праходзяць тэхагляд. Тут можна праверыць тармазную сістэму, замерыць дымнасць і таксічнасць адпрацаваных газаў і інш.
Як бачна, спектр прапанаваных паслуг па рамонце аўтамабіляў у райцэнтры даволі шырокі. Толькі вось работы па замене шкла аўто ў нас яшчэ не практыкуюцца, таму па неабходнасці трэба звяртацца ў сэрвісныя цэнтры вобласці.
Ала ЯКАЎЛЕВА