Лёгкага хлеба не бывае
Аляксей Гарбачоў, камбайнер Віцебскай доследнай меліярацыйнай станцыі, заняў трэцяе месца ў абласным спаборніцтве сёлетняга года на ўборцы зерневых культур сярод моладзевых экіпажаў. Ён намалаціў 1434 тоны збожжа і стаў удзельнікам рэспубліканскага свята «Дажынкі — 2012» у горадзе Горкі.
Нарадзіўся і вырас Аляксей на Сенненскай зямлі, у вёсцы Багданава. Скончыў мясцовую школу. Прафесію вадзіцеля набыў у Віцебскім ДТСААФ. Пасля
службы ў арміі хлопец не раздумваў, а вярнуўся ў родную гаспадарку, стаў працаваць на зямлі.
Вось ужо сем гадоў Аляксей Гарбачоў робіць камбайнерам у Віцебскай доследнай меліярацыйнай станцыі. Усе заданні выконвае ў тэрмін і якасна. Умее цаніць і правільна размеркаваць рабочы час. Кожную ўборачную кампанію ў лідарах у раённым спаборніцтве сярод моладзевых экіпажаў на ўборцы зерневых культур. У 2010 годзе быў удзельнікам абласных дажынак у Расонах.
Праца механізатара нялёгкая. Падчас напружаных сезонных работ трэба трымаць у выдатным стане машыну, калі не хочаш, каб яна падвяла ў самы адказны момант.
— Спачатку цэлы месяц рыхтаваў камбайн, — гаворыць Аляксей, — потым пачаліся ўборачныя работы. Можна сказаць, тры месяцы жыў у камбайне.» На традыцыйнае пытанне як удаецца быць лідарам, хлопец адказаў: «У мяне ніякіх сакрэтаў няма, я проста працаваў».
Калі выпадае свабодная гадзіна, дапамагае дзеду даглядаць пчол, любіць парыбачыць і проста пабыць на ўлонні прыроды. Ёсць і каханая дзяўчына. Зараз яна працуе ў адной з бухгалтэрый раённага аддзела адукацыі і завочна вучыцца ў Полацкім універсітэце.
На дажынках у Горках Аляксею асабліва спадабалася святочнае шэсце і цырымонія ўзнагароджання перадавікоў з удзелам Прэзідэнта краіны Аляксандра Лукашэнкі, розныя культурна-забаўляльныя мерапрыемствы.
У час ушанавання лепшы прадстаўнік хлебнай нівы нашага раёна Аляксей Гарбачоў атрымаў Дыплом і халадзільнік.
Выбар прафесіі іграе ў жыцці кожнага з нас вялікую ролю. І калі правільны гэты крок, значыць чалавека чакае задавальненне ў працы. У гэтых адносінах Аляксею пашанцавала. Для яго, зусім малога, любімым заняткам было пакатацца з бацькам на «палявым караблі». А ў 13-гадовым узросце ён ужо рабіў памочнікам камбайнера.
Ад сябе дадам: не сам па сабе прыйшоў поспех да Аляксея — карані яго ў сям’і, бо павагу да цяжкай працы хлебароба неабходна выхоўваць з дзяцінства. Менавіта родныя прывілі свайму сыну любоў да працы. Гэтаму немагчыма навучыць словамі, навукай можа быць толькі бацькоўскі прыклад. І сёння імя Аляксея Гарбачова займае пачэснае месца ў кагорце лідараў.
Ларыса Мукамолава.