В Витебске подвели итоги трудового семестра. В числе лучших оказались и представители Сенненщины

У Віцебску падвялі вынікі працоўнага семестра. Пераможцы вызначаны ў 11 намінацыях. У ліку тых, хто прымаў узнагароду з рук старшыні абласнога Савета дэпутатаў Уладзіміра Цярэнцьева, былі і прадстаўнікі Сенненшчыны.

У прыватнасці, ганаровай граматай аблсавета за эфектыўную арганізацыю дзейнасці студэнцкіх атрадаў адзначана першы сакратар райкама ГА “БРСМ” Марына Наваковіч. А раённы аператыўны штаб па каардынацыі і кантролю дзейнасці студэнцкіх і вучнёўскіх атрадаў Сенненскага раёна прызнаны пераможцам абласнога конкурсу “Працоўны семестр — 2016” у намінацыі “Лепшы тэрытарыяльны штаб па каардынацыі і кантролю дзейнасці студэнцкіх атрадаў”.

Сёлета на Сенненшчыне моладзі было дзе задзейнічаць свае сілы і працоўны запал. Студатрады сталі істотным падмацаваннем у рамках падрыхтоўкі нашага раёна да абласнога фестывалю працаўнікоў вёскі «Дажынкі-2016». У тым, як змянілася аблічча райцэнтра, таксама заслуга дзясяткаў юнакоў і дзяўчат, якія з’ехаліся ў Сянно на галоўную моладзевую будоўлю рэгіёну. У складзе двух студатрадаў займаліся добраўпарадкаваннем гарадскіх вуліц, зон адпачынку. У цэлым, на Сенненшчыне працавала 16 студэнцкіх фарміраванняў у колькасці 250 чалавек.

Вольга БАНДАРЭВІЧ.