Камунальнікі робяць чарговую спробу арганізаваць паасобны збор бытавога смецця

Камунальнікі робяць чарговую спробу арганізаваць паасобны збор бытавога смецця. Падтрымаем іх. Бо гэта ў інтарэсах кожнага сенненца.

У райцэнтры будзе працаваць 9 спецыяльных пляцовак. Першыя гатовы будуць прыняць смецце з 1 красавіка.

Як расказаў рэдакцыі Валерый Рога, начальнік участка па добраўпарадкаванні і азеляненні г. Сянно РУП ЖКГ, на кожнай пляцоўцы ўстановяць скрыні для збору шкла, паперы і пластыка, а таксама для несартаванага бытавога смецця. Камунальнікі вельмі спадзяюцца, што на гэты раз у іх усё атрымаецца. Работа над памылкамі зроблена.

— Перагледжаны графік вывазу смецця. Цяпер бытавыя адходы будуць забіраць нават у выхадныя дні, прынамсі з пляцовак для паасобнага збору. Скрыні замкнём, каб туды не скідвалі несартаванае смецце, а бамжы не забіралі шклотару, паперу, іншы ліквідны тавар, які можна рэалізаваць нарыхтоўшчыкам, — працягвае расказваць Валерый Рога.

Падобныя праблемы не навіна. Каб з імі справіцца неабходны настойлівасць і сістэмнасць у рэалізацыі пастаўленай мэты. А яшчэ супрацоўніцтва з насельніцтвам, павышэнне яго экалагічнай культуры. Збіраць, перапрацоўваць паперу, шкло, ПЭТ-бутэлькі, іншыя палімеры неабходна не толькі таму, што гэта другасная сыравіна, якую можна паўторна выкарыстоўваць для атрымання новых тавараў з дабаўленай вартасцю. У Беларусі наладжана перапрацоўка бытавога смецця, узво­дзяцца новыя магутнасці. Бытавое смецце, выкінутае ў лясах, нават сабранае на палігонах, забруджвае прыроду: глебу, грунтовыя воды, атмасферу не на многія гады — стагоддзі. Ці ведаюць гэта, ці разумеюць небяспеку дарослыя, школьнікі? Думаецца, не. Азірніцеся навокал, паназірайце за паводзінамі сваіх суседзяў, родных…

Нарэшце, кожны з нас павінен быць адказным перад нашчадкамі, мець актыўную грамадзянскую пазіцыю. Тады ўсё ўдасца.

 Аляксандр ЛАЗЮК.

НА ЗДЫМКУ: завяршаецца абсталяванне пляцоўкі для збору другаснай сыравіны на вуліцы Назаранкі.

Фота аўтара.