Неабыякавы качагар

 У РУП ЖКГ занята каля 600 работнікаў розных прафесій і спецыяльнасцей. Даволі масава на прадпрыемстве прадстаўлены машыністы кацельных установак. Невялікая іх частка працуе на газавым абсталяванні, у кацельнях, дзе загрузка паліва робіцца аўтаматычна. Астатнія машыністы абслугоўваюць катлы, у якіх выкарыстоўваюцца дровы, што загружаюцца ўручную.

 Менавіта ў такой кацельні працуе Сяргей Цыплякоў. Стаж яго працы на адным месцы складае 11 гадоў. Сёлета напярэдадні прафесійнага свята за шматгадовую добрасумленную працу ён узнагароджаны Ганаровай граматай райвыканкама.

Ладна збіты, каржакаваты — у фігуры адчуваецца немалая фізічная сіла. Людзі, якія працуюць побач з ім, адзначаюць яго гатоўнасць прыйсці на дапамогу, нераўнадушша да вытворчых праблем.

— Праца ў нас не толькі цяжкая фізічна (за змену бывае да 10 кубаметраў дроў закінуць у кацёл даводзіцца), яна яшчэ і адказная. Трэба ўважліва сачыць за паказчыкамі манометраў, работай помпаў, іншага абсталявання. Калі ў сістэме здараюцца непаладкі, а ты іх своечасова не заўважыш, да бяды, надзвычайнага здарэння на вытворчасці недалёка, — расказвае мой субяседнік.

Бесперабойнасць, эфектыўнасць работы крыніцы цяпла залежаць не толькі ад машыністаў.

Сваімі партнёрамі яны лічаць інжынерную службу, брыгады нарыхтоў­шчыкаў дроў, кіраўнікоў вытворчых падраздзяленняў.

— Сёлетняй зімой, дзякуючы добрай падрыхтоўцы кацельні, цеплатрасы, ні на адну гадзіну не спынялі працу, павысілася эфектыўнасць работы, менш пайшло дроў на выпрацоўку адной гігакалорыі цяпла. Не было перабояў з пастаўкай паліва. Ды і дровы, што пастаўляліся ў кацельную, былі сухія. Вытворчасць цяпла — справа калектыўная, — справяд­ліва лічыць Сяргей Цыплякоў.

Кацельня, дзе ён працуе, пастаўляе цяпло для бальніцы. Хворым, медыкам яно неабходна, магчыма, як нікому. Сяргей Цыплякоў з задавальненнем адзначае, што ў апошнія гады адміністрацыя лячэбнай установы таксама зрабіла шмат дзеля змяншэння страт цяпла. У аддзяленнях, паліклініцы ўстаноўлены шклопакеты.

Сяргей Яўгенавіч не бачыць у сваіх адносінах да працы нічога звышнатуральнага. Інакш працаваць ён не ўмее. А вось да аплаты працы, на яго думку, павінны быць іншыя падыходы: у залежнасці ад выпрацаваных гігакалорый, спаленых дроў, нарэшце, захаванні парадку ў кацельні і вакол яе. Такі вось ён неабыякавы чалавек — машыніст кацельнай устаноўкі Сяргей Цыплякоў.

 Аляксандр ІЎЕЎ.

НА ЗДЫМКУ: Сяргей Цыплякоў.