Уладальніца аранжарэі — а інакш і не скажаш пра Алу Сарокіну з г.Сянно

Уладальніца аранжарэі. А інакш і не скажаш пра Алу Сарокіну з райцэнтра. Жанчына – яркі прыклад таго, як, нягледзячы на ўзрост і іншыя абставіны, можна акружыць сябе прыгажосцю. Тым больш, быць сапраўдным прыкладам для моладзі.

Усё жыццё Ала Аляксандраўна прысвяціла сельскай гаспадарцы. Працавала ў саўгасе «Полымя»: была даяркай, брыгадзірам, некаторы час – загадчыцай фермы. Жанчына сціпла дзеліцца сваімі дасягненнямі. Што і казаць — чалавек працы. З асаблівай цеплынёй у голасе расказвала пра тое, што раёнка пра яе пісала амаль 30 гадоў назад. Ужо тады жанчына з вялікай адказнасцю ставілася да пытанняў добраўпарадкавання. Не толькі дома, але і на працы ўпрыгожвала памяшканні рознымі раслінамі. Любоў да іх прывіла маці, якая таксама займалася развядзеннем кветак.

На жаль, дом у в. Відокі, у якім прайшло амаль усё жыццё, Але Сарокінай прыйшлося пакінуць. Не так даўно пераехала ў райцэнтр. Жыве жанчына ў інтэрнаце па вуліцы Кастрычніцкая. Раслінамі яна ўпрыгожыла не толькі пакоі свайго новага дома, але і разбіла кветнік ля яго.

Даглядаць за раслінамі – праца: іх і паліць трэба, і падкарміць своечасова, каб яны радавалі сваёй прыгажосцю. На пытанне, ці складана гэтым займацца, жанчына адказвае, што не. Такая праца ёй не ў цяжар. Гэта любімы занятак, які надае сіл, своеасаблівая аддушына.

На жаль, аднадумцаў сярод суседзяў у Алы Аляксандраўны няшмат. Пэўна, многія з іх падтрымліваюць мінімалізм у пытаннях добраўпарадкавання. Безумоўна, у кожнага свае погляды. 

Практычна кожны дзень жанчына рупіцца ля свайго кветніка. Каля дзесяці відаў раслін пасаджана тут. І гэта яшчэ не ўсё, дадае яна, у планах яшчэ шмат новага, цікавага.

Чалавек, які вырас у вёсцы, не можа існаваць без справы ў горадзе, тлумачыць мая суразмоўца. Патрэбна, каб рукі заўсёды былі чымсьці занятыя, ды і бачыць з вакна квітнеючую клумбу прыемней, чым пусты двор. Згодны, аднаго жадання жыць у прыгажосці – мала, трэба да гэтага прыкласці намаганні.

Добрасумленнасць ва ўсім – гэта пра Алу Аляксандраўну. Тут хочацца адзначыць і той факт, што ў час урачыстага мерапрыемства, прымеркаванага да святкавання 1 Мая, Ала Сарокіна атрымала Падзяку раённага выканаўчага камітэта за шматгадовую добрасумленную працу ў сістэме сельскай гаспадарцы і асабісты ўклад у развіццё жывёлагадоўчай галіны аграпрамысловага комплексу раёна. Узнагароду ёй уручыў старшыня райвыканкама Алег Макарэвіч.

Ксенія КРУПСКАЯ.

Фота аўтара.