Портрет Светланы Колбенок размещен на Доске почета Белорусского профессионального союза работников культуры, информации, спорта и туризма

Партрэт старшыні Сенненскай раённай арганізацыі Беларускага прафесіянальнага саюза работнікаў культуры, інфармацыі, спорту і турызму Святланы Калбянок у гэтым годзе змешчаны на Рэспубліканскай Дошцы гонару галіновага прафсаюза.

Безумоўна, гэта гонар для раёна, бо такім чынам на рэспубліканскім узроўні дадзена высокая адзнака работы самой Святланы Ула­дзіміраўны. Без малога тры гады як яна займае гэтую пасаду. Адказнасць, камунікатыўнасць, гатоўнасць дапамагчы – менавіта такія якасці і характарызуюць Святлану Калбянок.

 На сённяшні дзень раённая арганізацыя аб’ядноўвае 6 пярвічных прафсаюзных арганізацый. Агульная колькасць членаў —196 чалавек, што складае 92,4%. Адным з прыярытэтных накірункаў работы аб’яднання з’яўляецца сацыяльнае партнёрства адміністрацыі і райкама. Яно рэалізуецца праз заключэнне калектыўных дагавораў. Гэта дапамагае падняць узровень дадатковых сацыяльных грантый для членаў пэўнага калектыву. «Людзі могуць разлічваць на матэрыяльную падтрымку з боку прафсаюза. А ў пытаннях працоўнага заканадаўства – на бясплатную юрыдычную дапамогу з боку юрыстаў прафсаюза», — адзначае Святлана Уладзіміраўна.

 Яна лічыць, што і ў працы, і ў жыцці вельмі важна ставіць сябе на месца іншага чалавека і ўсе праблемы вырашаць з менавіта з такога пункту гледжання. Гэты прынцып дапамагае знайсці агульную мову з калегамі, набыць шмат аднадумцаў.

 Сенненскі райкам прафсаюза работнікаў культуры, інфармацыі, спорту і турызму цесна супрацоўнічае з органамі дзяржаўнай улады на прынцыпах сацыяльнага партнёрства, раўнапраўя і супрацоўніцтва бакоў, захоўваючы самастойнасць і свабоду дзеянняў пры адстойванні правоў і законных інтарэсаў сваіх членаў у рамках дзеючага заканадаўства Рэспублікі Беларусь. Ажыццяўляецца гэтае ўзаемадзеянне праз удзел у выбарах розных узроўняў.

Адзін з важных і складаных накірункаў дзейнасці – праца са зваротамі грамадзян, адзначае Святлана Калбянок. І складанасць яе заключаецца ў тэрытарыяльнай аддаленасці некаторых устаноў. У сувязі з гэтым шматлікія звароты вусныя, па тэлефоне. Носяць кансультатыўны характар. Вялікі пласт работы праходзіць і па заявах на аказанне матэрыяльнай дапамогі членам прафсаюза. Так, у мінулым годзе гэта патрачана 1533 рублі. Некаторыя звароты былі накіраваны ў Віцебскую абласную арганізацыю для правядзення выплат. «Увогуле, нашы калегі з вобласці дапамагаюць не толькі ў фінансавых пытаннях, але аказваюць і метадычную дапамогу», — гаво­рыць Святлана Калбянок.

 Не менш важным накірункам прафсаюзнай работы застаецца аздараўленне членаў прафсаюза і іх дзяцей. Прафсаюзная арганізацыя праводзіць частковае фінансаванне кошту дзіцячых пуцёвак. На жаль, у мінулым годзе са складанай эпідэміялагічнай сітуацыяй санаторна-курортнае лячэнне членамі галіновага прафсаюза аказалася незапатрабаваным.

 «Я магу з упэўненасцю сказаць, што мне пашчасціла са старшынямі пярвічных прафсаюзных арганізацый, што ўваходзяць у структуру раённай арганізацыі, — не хавае мая суразмоўца. – Гэта мае памочнікі – людзі яркія, пазітыўныя. Таму і праца ў нас ладзіцца. Штогод мы ўдзельнічаем у рэспубліканскай акцыі «Прафсаюзы – дзецям». Аказваем дапамогу па зборы дзіцяці ў школу. Да навагодніх святаў з салодкімі падарункамі наведваемся да юных сенненцаў у шматдзетныя і малазабяспечаныя сем’і. Ладзім для малышоў невялічкую святочную праграму з удзелам Дзеда Мароза і Снягурачкі».

 У раёне шмат увагі надзяляецца спорту, здароваму ладу жыцця. І гэту ініцыятыву падтрымліваюць у раённай арганізацыі Беларускага прафесіянальнага саюза работнікаў культуры, інфармацыі, спорту і турызму. Члены пярвічных прафсаюзных арганізацый аб’яднання заўсёды ў ліку ўдзельнікаў круглагадовай спртакіяды сярод арганізацый, прадпрыемстваў і сельскіх саветаў. Толькі ў мінулым годзе на спартыўную і культурна-масавую работу патрачана 3163,38 рублёў.

 Быць прафсаюзным лідарам – справа не з лёгкіх. Ты заўсёды ў цэнтры падзей, заўсёды з людзьмі, якіх трэба не толькі выслухаць, але і па магчымасці дапамагчы разабрацца з праблемай. І гэта апроч усіх тых дакументаў, якія трэба правільна і своечасова аформіць. Але, як бы складана не было, Святлана Калбянок спраўляецца і робіць гэта на высокім узроўні.

 Ала ЯКАЎЛЕВА.

Фота аўтара.