ДОБРЫХ КАМАНДЗІРАЎ ВАМ, ХЛОПЦЫ!

Пад марш «Развітанне славянкі» ў выкананні духавога аркестра раённага цэнтра культуры і народнай творчасці вось ужо на працягу некалькіх дзён сенненскія хлопцы адбываюць на тэрміновую службу ва Узброеныя Сілы нашай краіны. Карэспандэнт «ГС» пабывала на адпраўцы прызыўнікоў, якія прымераюць форму паветрана-дэсантных войскаў.

А сёмай гадзіне раніцы ля варот райваенкамата сабраліся родныя і сябры чатырох будучых дэсантнікаў. Хлопцы праходзілі кантрольны медагляд і апошні інструктаж, які правёў начальнік групы прызыву Аляксандр Ахрамовіч.
— Шмат юнакоў сёлета аказаліся непрыгоднымі да службы ў арміі, у асноўным, па прычыне здароўя, сямейных абставін, вучобы, — кажа ваенны камісар райваенкамата, падпалкоўнік Сяргей Пінчук. — На жаль, ёсць і тыя, хто ўхіляецца ад ваеннай службы. Такіх каля 20 чалавек. Шэраг з іх аб’яўленыя ў вышук, хтосьці ўжо асуджаны.
Аднак большасць навабранцаў — усё ж сумленныя грамадзяне. З адным такім давялося пазнаёміцца ў час адпраўкі. Дзмітрый Рапінскі з Багушэўска задаволены тым, што прайшоў адбор у элітныя войскі, а менавіта ў 103-ю асобную гвардзейскую мабільную брыгаду (г.Віцебск). Малады чалавек упэўнены: прайсці армію — абавязак кожнага мужчыны. У Дзмітрыя падрастае сын, для якога ў будучыні выбар бацькі стане прыкладам для пераймання. «Побач любая жонка Паліна, а значыць, ніякія цяжкасці мяне не пужаюць», — кажа Дзмітрый.
Сёлета навабранцамі з Сенненшчыны папоўняцца вайсковыя часці, размешчаныя ў Заслонаве, Полацку, Фаніпале, Гомелі, Віцебску і Мінску.
Ірына ХАСАНАВА.
Фота аўтара.
ДАРЭЧЫ, медыцынскі агляд належала прайсці 120 сенненцам. Прызнаны прыгоднымі крыху больш за 30 чалавек.