Подведены итоги районного турнира по волейболу

Пераможцамі традыцыйнага для раёна турніра па валейболе, які штогод праводзіцца сярод каманд працоўных калектываў, сталі валейбалісты аддзела па адукацыі райвыканкама. Камандзе ўручаны пераходны кубак, валейбалістам – медалі.

 У ліку прызёраў каманды  РАНС і сектара спорту і турызму райвыканкама. Пры падвядзенні вынікаў спаборніцтва арганізатары адзначылі граматамі і сувенірамі найлепшага і самага каштоўнага валейбалістаў турніру. Імі сталі Павел Распорскі (аддзел адукацыі) і Мікалай Долатаў (сектар спорту і турызму). Самым актыўным балельшчыкам прызнаны Юрый Дубавец.

 Турнір доўжыўся амаль месяц. На жаль, колькасць каманд-удзельніц зменшылася ў параўнанні з папярэднімі гадамі, што, зрэшты, вытлумачальна. Затое ў валейбалістаў, якія ўдзельнічалі ў турніры, прыкметна павысіўся ўзровень майстэрства, вырасла цікавасць да турніру з боку балельшчыкаў і грамадскасці. Дакладней, грамадскіх арганізацый, якія таксама далучыліся да падтрымкі турніру, заснаваўшы для яго ўдзельнікаў некалькі намінацый.

 Раённая арганізацыя ГА “Белая Русь” уганаравала Распорскіх. На турніры носьбіты гэтага прозвішча выступалі ажно за тры каманды. Адзначаны начальнік раённага аддзела Дэпартамента аховы МУС Алег Дзяшкевіч. Афіцэр міліцыі не толькі рэгулярна наведваўся на гульні каманды як балельшчык, але пры неабходнасці выходзіў на пляцоўку ў якасці гульца. Грамадская арганізацыя падтрымала таксама Уладзіслава Янукова, які стаў адкрыццём турніра, адзначыла самага справядлівага суддзю Уладзіміра Дубаўца. Маючы за плячыма шаноўныя гады, ён не так даўно яшчэ апранаў спартыўную форму для ўдзелу ў валейбольных баталіях.

Галоўнае жаночае аб’яднанне (БСЖ) і яго раённая арганізацыя таксама не пакінулі без увагі валейбольны турнір, адзначыўшы гульню Анастасіі Распорскай і Алены Яфімавай. Жанчыны выступалі за каманды сектара спорту і турызму і аддзела Дэпартамента аховы.

 Вітаючы ўдзельнікаў і пераможцаў спаборніцтваў, балельшчыкаў і суддзяў, намеснік старшыні райвыканкама Зоя Фаміна, якая выказвала сваё меркаванне і ад імя раённых арганізацый грамадскіх аб’яднанняў, адзначыла, што здаровы лад жыцця, масавы спорт – гэта прыярытэтны напрамак дзяржаўнай палітыкі, ідэалогія Рэспублікі Беларусь, падтрыманая грамадскасцю і ўсімі жыхарамі краіны і раёна. Іх эфектыўнасць пацвярджаецца штодня, у тым ліку турнірам, вынікі якога толькі што падведзены.

 Аляксандр ЯЎГЕНАЎ.

  Фота прадастаўлены сектарам спорту і турызму райвыканкама.