Весенние полевые работы идут в ОАО “Беленево”

У ААТ “Бяленева” сёлетняй вясной узнялі больш за 2 тыс. га ворыва, падрыхтавалі да сяўбы звыш 1,5 тыс. га глебы, прыблізна такую ж плошчу засеялі раннімі зерневымі і зернебабовымі культурамі. Важкія лічбы дазволілі выйсці найбуйнейшаму ў раёне вытворцы зерня ў лік лідараў па тэмпах палявых работ.

— Без дапамогі спецыялістаў і тэхнікі Віцебскай інтэграцыйнай структуры тэмпы былі б ніжэйшыя,- не хавае галоўны аграном гаспадаркі Андрэй Юсікаў.- Яны першымі пачалі працу ў полі, ды і тэхніка іх больш магутная і прадуцыйная.

 Вялікія зямельныя плошчы, разнастайнасць па характарыстыкам глеб таксама садзейнічаюць арганізацыі працы. Пачалася яна ў аддзяленні “Полымя”, дзе пераважае  пясчаная па структуры зямля.

У гэтыя дні большасць тэхнікі сканцэнтравана ў раёне вёскі Какоўчына, дзе таксама шмат лёгкіх глеб. Тут зараз працуе тэхніка і з Віцебска, і ўласна бяленеўская. На сяўбе найбольшая выпрацоўка прыходзіцца на пасяўны агрэгат Амазон. Яшчэ адна яго каштоўная якасць – раўнамерны высеў на адну глыбіню зерня, ідэальнае яго закрыццё. Адначасова ўносіцца і комплекс мінеральных угнаенняў. Усе параметры задаюцца і кантралююцца з выкарыстаннем камп’ютара.

 Міхаіл Мірончык таксама працуе на замежнай тэхніцы. Ён за рулём расійскага Кіраўца і заняты на культывацыі, падрыхтоўцы глебы да сяўбы. На Сенненшчыне – у камандзіроўцы з пачатку сакавіка. Даводзіцца працаваць і ў начную змену , што, зрэшты, гараджаніна ніколькі не напружвае. Ды і на папярэднім месцы працы ў Гарадоцкім раёне выконваў тую ж работу. Стараюцца і мясцовыя механізатары.

Аляксандр ЯЎГЕНАЎ.

Фота аўтара.