Максим Кожарский в очередной раз стал чемпионом Республики Беларусь по греко-римской борьбе

Наш зямляк Максім Кажарскі ў чарговы раз стаў чэмпіёнам Рэспублікі Беларусь па грэка-рымскай барацьбе ў вагавай катэгорыі да 60 кг.

Без асаблівых праблем дайшоўшы да фіналу ён ва ўпартай барацьбе перамог Ігара Беляка, які прадстаўляў Мінскую вобласць. 

 Званне мацнейшага, атрыманае сёлета, мае асабліва важнае значэнне для любога спартсмена. Нагадаем, 2020 год – алімпійскі. Праўда, каб патрапіць у Японію, трэба пераадолець яшчэ некалькі перадалімпійскіх бар’ераў. Першы з іх — у Рыме, дзе 8 лютага пройдзе чэмпіянат Еўропы.

 — На такіх спаборніцтвах я выступаў пяць разоў. І кожны раз станавіўся пятым. Спадзяюся сёлета дабіцца больш важкага выніку, — падзяліўся сваімі планамі Максім Кажарскі, які пасля перамогі ў Мінску прыязджаў у Сянно. Дарэчы, за яго паядынкамі на дыване сачылі з трыбун, падтрымлівалі ў раздзявалцы яго першыя трэнеры Анатоль Кучынскі і Анатоль Рыбчанка.

 Дастойна выступіць, а тым больш атрымаць медаль на чэмпіянаце Еўропы, бузумоўна, прэстыжна. Аднак галоўная задача спартсмена на бліжэйшы перыяд — заваяваць алімпійскую ліцэнзію. Здабываць яе давядзецца на ліцэнзійных турнірах, якія пройдуць неўзабаве пасля чэмпіянату Еўропы ў Венгрыі і Францыі. У адным з іх абавязкова будзе ўдзельнічаць Максім Кажарскі.

 Зрэшты, нават заваяванне алімпійскай ліцэнзіі не гарантуе ўдзел у галоўных спаборніцтвах чатырохгоддзя. Хто канкрэтна паедзе на алімпіяду, вызначае трэнерскі штаб зборнай каманды.

 Аляксандр ЯЎГЕНАЎ.

 На здымку: Максім Кажарскі разам са сваімі першымі трэнерамі Анатоліем Кучынскім і Анатоліем Рыбчанкам.

Фота аўтара.