ТРАВУ СЕЕ ЎСЮДЫХОДНАЯ «ДЗВІНА»

Надзвычай цёплы сакавік не застаў знянацку хлебаробаў ААТ «Студзёнка». З дапамогай «Дзвіны», машыны на пнеўматычным хаду, у сельгасарганізацыі завяршаюць сяўбу насення траў па азімых зерневых. Пры заданні 210 га работы праведзены на плошчы амаль 200 га.

За рулём усюдыходнай машыны — Аляксей Папалаў. Для 23-гадовага ўраджэнца Оршы, які змяніў гарадскую прапіску на сельскую, сёлетняя веснавая кампанія першая ў працоўнай біяграфіі. Яшчэ зусім нядаўна ён працаваў у рамонтнай майстэрні.
— З работай зваршчыка Аляксей таксама нядрэнна спраўляўся. Але механізатараў не хапае. І я прапанаваў хлопцу змяніць сферу дзейнасці, — расказаў Андрэй Дзядушка, галоўны аграном сельгасарганізацыі.
Аляксей не хавае — у яго таксама ёсць уласны інтарэс. Праца ў якасці механізатара дае больш магчымасцей для павышэння дабрабыту маладой сям’і, дзе гадуецца маленькае дзіця, а жонка знаходзіцца ў водпуску па яго доглядзе.
Нягледзячы на адсутнасць вопыту работы на сельскагаспадарчай тэхніцы, экстрэмальныя ўмовы працы, Аляксей Папалаў кожны дзень высявае насенне на 30-35 га. Ужо ў бліжэйшы час ён прыступіць да сілкавання мінеральнымі ўгнаеннямі сенажацяў і пашаў, азімых зерневых культур. Ранняй вясной гэтыя работы пад сілу толькі ўсюдыходным машынам.
Насенне траў будзе высявацца і ў больш познія тэрміны па яравых зерневых культурах — згодна з заданнем на 920 га. На 90 га адбудзецца перазалужэнне.
Перад агранамічнай службай раёна пастаўлена няпростая задача — у бліжэйшай перспектыве ўмацаваць кармавую базу жывёлагадоўчай галіны. Зрабіць гэта прасцей за ўсё за кошт пашырэння пасяўных плошчаў бабовых траў. У ААТ «Студзёнка» для нарыхтоўкі сіласу і сенажу пашыраюцца пасевы ў сумесі канюшыны і цімафееўкі. На 120 га будзе пасеяна канюшына ў чыстым выглядзе, на 100 — цімафееўка. Наяўнасць насеннікаў дазволіць мець у аддаленай перспектыве насенне траў не толькі для ўласных патрэб, але і на продаж. Думаюць у гаспадарцы і аб збалансаваным рацыёне дойнага статку ў перыяд летняга ўтрымання. Яго каровы могуць знайсці толькі на пашах, створаных са спецыяльна падабраных сумесяў. А таму без вырашэння комплекса задач не варта нават спадзявацца на далейшае нарошчванне вытворчасці малака і іншай жывёлагадоўчай прадукцыі.
Аляксандр ЛАЗЮК.
НА ЗДЫМКУ: Аляксей Папалаў, механізатар ААТ «Студзёнка».