Лепшыя мастакі жывуць у Сянне

У рэспубліканскім конкурсе малюнкаў і вершаў “Мой першы падручнік – “Буквар”, які праводзіўся ў рамках святкавання 400-годдзя выдання, адразу дзве работы юных сенненак заваявалі прызавыя месцы.

 Задачамі конкурсу з’яўляліся выхаванне пазітыўнага стаўлення да чытання, развіццё творчых здольнасцяў хлопчыкаў і дзяўчынак, а таксама папулярызацыя дзейнасці дзіцячых бібліятэк.

 Назарыя Сірэнка, вучаніца другой гарадской школы, атрымала гран-пры ў намінацыі “Лепшы малюнак, прысвечаны “Буквару” ва ўзроставай катэгорыі ад 10 і старэй. А работа Дар’і Буйдо, навучэнкі СШ №1, «И стали люди грамотными», заняла першае месца ў гэтай жа намінацыі. Дзяўчаты атрымалі дыпломы і памятныя падарункі. Для абедзвюх гэта не першы поспех. Яны неаднаразова станавіліся прызёрамі разнастайных рэспубліканскіх творчых конкурсаў. У іх шмат захапленняў, але маляванне, бадай, самае любімае. Назарыя займаецца выяўленчым мастацтвам з дзяцінства, Дар’я – апошнія тры гады.

 Прыемна адзначыць, што ў спісе пераможцаў конкурсу “Мой першы падручнік” нашы дзяўчаты былі адзінымі прадстаўнікамі з Віцебскай вобласці. Абсалютная большасць прызёраў — навучэнцы Мінскіх школ.

Ала ЯКАЎЛЕВА.

На здымку: (злева на права) Н.Сірэнка і Д.Буйдо.