Ориентир на клиентов, именно этим и руководствуется в своей работе Елена Блыкина

Заўсёды ветлівая, ініцыятыўная і старанная — гэтыя словы як нельга лепш падыходзяць да Алены Блыкінай, фармацэўта аптэкі №24 г. Сянно.

 Адразу хочацца адзначыць, што тэму для гэтай публікацыі нам падала жыхарка райцэнтра, даўняя падпісчыца раённай газеты Ганна Лапеха. Жанчыне дужа падабаецца, як ставяцца да пакупнікоў ў аптэцы. Ганна Пятроўна вельмі добра адзывалася пра ўвесь калектыў, але пра Алену Блыкіну душэўных слоў жанчына і ўвогуле не пашкадавала. Гэта стала для нас добрай падставай, каб сустрэцца з фармацэўтам.

 Пасля заканчэння медыцынскага вучылішча ў Магілёве Алена Блыкіна адразу стала працаваць па спецыяльнасці. Быў час, калі мая суразмоўца займала пасаду загадчыка Беліцкай аптэкі, але ўсе ж такі большую палову свайго стажу яна працуе фармацэўтам.

 — Скажу шчыра, што я не зусім свядома абрала гэтую сферу дзейнасці, але за ўвесь час працы не было ні адной хвіліны, каб я пашкадавала аб гэтым, — кажа жанчына.

 Апроч прафесійных ведаў і навыкаў у яе прафесіі таксама неабходны чалавечнасць і ўважлівасць, упэнена Алена Міхайлаўна, якая імкнецца зрабіць так, каб з аптэкі кожны яе наведвальнік пайшоў не толькі з патрэбнымі лекамі, але і ў добрым настроі. Фармацэўт валодае глыбокімі прафесійнымі ведамі, карыстаецца заслужаным аўтарытэтам і павагай сярод кіраўніцтва і калег, дзякуючы адказным адносінам да справы.

— Калі параўноўваць паказчыкі яе працы, то сярод калег Алена Міхайлаўна сапраўды вылучаецца. З такім супрацоўнікам лёгка і проста. Яна не толькі выдатна выконвае ўсе свае абавязкі, а і імкнецца ўнесці ў працу калектыву нешта новае, цікавае. Выдатна ладзіць з каллегамі, заўсёды дапамагае маладым спецыялістам. Хочацца адзначыць, што ў аптэцы ўсе спецыялісты, у тым ліку і маладыя, — сапраўдныя прафесіяналы, — адзначыў Канстанцін Кацюба, загадчык аптэкі №24.

 Існуе меркаванне, што фармацэўты — сапраўдныя чараўнікі. Калі напісаны доктарам рэцэпт пацыент прыносіць у аптэку, фармацэўт, толькі зірнуўшы на бланк, тут жа разумее, што на ім напісана.

 — Не заўсёды людзі памятаюць назвы прэпаратаў, якія ім выпісвае лекар. Я даўно працую ў гэтай сферы і цяжкасцей з расшыфроўкай не ўзнікае, — адзначае Алена Міхайлаўна. Многіх са сваіх пакупнікоў жанчына даўно добра запомніла і ўжо дакладна ведае, што і каму прапанаваць.

  Падчас інтэрв’ю  з карэспандэнтам «ГС» Алена Міхайлаўна адлучаецца на працоўныя моманты. Дзіўна, што гэта ніяк не ўплывае на працэс. Жанчына ўмела сумяшчае некалькі спраў адначасова. Напэўна, гэта і ёсць прафесіяналізм: дакладна ведаць адказы на мноства пытанняў.

 Ксенія КРУПСКАЯ.

Фота аўтара.