Не оставили в беде семью из Богушевска

Сям’я Івана i Юліі Ільюшэнка, якія ў час нядаўняга пажару страцілі жыллё і ўсю маёмасць, працягвае атрымоўваць маральную і матэрыяльную падтрымку, арганізаваную грамадскасцю раёна па ініцыятыве сацыяльна-педагагічнага Цэнтра г.Сянно. На днях халадзільнік і газавую пліту для іх набылі работнікі перапампоўваючай станцыі “Сянно”.

— Гучных заклікаў не было. Ахвяраванні рабіліся на добраахвотнай аснове, суму таксама кожны з членаў калектыву арганізацыі вызначаў сам, — расказаў Віктар Дзергачоў, намеснік начальніка па бяспецы. — Збор сродкаў арганізаваў Аляксей Сакалоўскі, які ўзначальвае ў нас прафсаюзную арганізацыю.

 Ільюшэнкі зараз жывуць у Багушэўску, у кватэры, у якой ні халадзільніка, ні газавай пліты няма. Так што бытавыя прыборы, дастаўленыя ПС “Сянно”, аказаліся вельмі дарэчы.

 І не толькі яны. Усе рэчы, любая дапамога людзям, якія ў выніку пажару згубілі ўсё, спатрэбіцца.

 — Наша дачушка атрымала прагулачную каляску, сын — дзіцячы ложак і веласіпед. Дзяцей апранулі з ног да галавы. Нам перадалі набор посуду, сродкі гігіены… Дзякуй вам усім, добрыя людзі, — расчулілася ў час размовы Юлія Ільюшэнка.

 Па яе словах, дапамога прыходзіць ледзь не штодня. Па інфармацыі, атрыманай у СПЦ г. Сянно, да гуманітарнай акцыі далучыліся ўстановы адукацыі, і іншыя арганізацыі горада і раёна, аддзелы райвыканкама, грамадскія арганізацыі, прадпрымальнікі.

 На здымку: сям’я Ілью­шэнка і прадстаўнікі ПС “Сянно” Аляксей Сакалоўскі і Віктар Дзергачоў пасля перадачы бытавых прыбораў.