Каково это — быть учителем белорусского языка и литературы и одновременно вести уроки физической культуры и здоровья, знает Марина Мацкевич

Дабівацца пастаўленых мэт вучыць дзяцей педагог другой гарадской школы Марына Мацкевіч. Яна з кагорты тых настаўнікаў, хто словы падмацоўвае справай. Марына Леанідаўна асабістым прыкладам даказвае, што няма нічога недасягальнага. Але ўсё па парадку.

 Марына Мацкевіч выкладае беларускую мову і літаратуру, з нядаўняга часу вядзе яшчэ і ўрокі фізічнай культуры і здароўя. Два зусім розныя прадметы, якія патрабуюць абсалютна рознай падрыхтоўкі. І ўсё ж, у Марыны Леанідаўны атрымліваецца гэта сумяшчаць. Настаўніца мае 25 гадоў педагагічнага стажу. У мінулым навучальным годзе прайшла перападрыхтоўку па спецыяльнасці фізкультурна-аздараўленчая дзейнасць.

 «Калі б у пачатку маёй прафесійнай дзейнасці хтосьці сказаў, што я прымеру на сабе ролю настаўніка фізвыхавання, — не паверыла б», — дзеліцца педагог. Спорт заўсёды ў яе жыцці займаў значнае месца. Біятлон – вось той занятак, на якім яна вырасла. Будучы вучаніцай пятага класа пачала займацца ім у Валерыя Лектарава, трэнера СДЮШАР. Тады яшчэ секцыя называлася «Лыжныя гонкі». Але так атрымалася, што калі ў старэйшых класах трэба было вызначацца з далейшай будучыняй, з біятлонам яна жыццё не звязала.

 «Я заўсёды з асаблівым задавальненнем наведвала ўрокі фізкультуры, якія вяла Раіса Вілюгіна, трэніроўкі Валерыя Лектарава, — успамінае Марына Леанідаўна. – Разумела, наколькі важны здаровы лад жыцця, праца над сабой. Аднак у спорце я сябе не бачыла. У прыярытэце на той момант стала захапленне беларускай мовай. Настаўніца Ларыса Гапеева прывіла любоў да роднага слова».

 Як паказаў час – Марына Мацкевіч засталася ў спорце, і няхай у аматарскім, і ўсё ж. А калі падраслі свае дзеці, — прывяла іх у секцыю да Валерыя Лектарава. Часта разам з імі хадзіла на трэніроўкі. Праўда, старэйшая дачка Анастасія не звязала свой лёс з біятлонам, яна перакладчык. А малодшы Раман вучыцца на факультэце фізічнага выхавання ва ўніверсітэце імя П.М.Машэрава.

 Увесь мой час завязаны на спорце, адзначае настаўніца, інакш я не ўмею. Марына Леанідаўна з’яўляецца частым удзельнікам рознага плану спартыўных мерапрыемстваў. Нярэдка прадстаўляе раён у галіновых спартакіядах. Яна заўсёды ў ліку пераможцаў і прызёраў.

 Марына Мацкевіч умела сумяшчае працу ў школе з трэніроўкамі юных сенненцаў. З новага навучальнага года яна паўнапраўны трэнер секцыі па біятлоне ў СДЮШАР.

 Чым бы чалавек не займаўся, трэба ставіць перад сабой задачу быць першым у гэтай справе, так, можа быць і не заўсёды, не важна. Важна даказаць сабе, што можаш быць першым, — вось ён, жыццёвы падыход Марыны Мацкевіч, з якім проста немагчыма не пагадзіцца.

Ала ЯКАЎЛЕВА.

Фота аўтара.