Сенненскія школьнікі запрасілі сваіх матуль на салодкі стол

Такім чынам вучні 4 “Б” класа СШ №1 г.Сянно павіншавалі сваіх матуль і бабуль з Днём маці.

 Мерапрыемства — “Ты единственная такая, любимая и родная” прайшло ва ўтульнай чытальнай зале дзіцячай бібліятэкі, якую з радасцю прадаставілі яе супрацоўнікі. Яны, дарэчы, разам з класным кіраўніком Ірынай Вільчынскай, распрацавалі і сцэнарый вечарыны.

 Падчас імпрэзы пра маці было сказана шмат добрых пранікнёных слоў. За святочным сталом панавала атмасфера добразычлівасці: хлопчыкі і дзяўчынкі спявалі, чыталі вершы. Рознага плану забаўляльныя конкурсы, віктарыны, арганізаваныя супрацоўнікамі бібліятэкі, не давалі сумаваць. Яны аб’ядналі разам дарослых і дзяцей, якія з непаддзельным задавальненнем прымалі ў іх удзел.  

 Скончылася мерапрыемства ўручэннем падарункаў ад юных сенненцаў віноўніцам урачыстасці. Святочныя паштоўкі з добрымі словамі ў адрас блізкага чалавека, а таксама папяровыя сардэчкі з выявамі дзіцячых далонек далоні, дзеці прыпаднеслі сваім матулям. “Узнёслы настрой і станоўчыя эмоцыі паспрабуем захаваць да наступнай сустрэчы ў сценах бібліятэкі”, —  ад імя ўсіх бацькоў дзякавала арганізатарам сустрэчы Адэля Едзікарава. 

Ала ЯКАЎЛЕВА.

Фота аўтара.