“Масленіца-блінніца, вясны імянінніца”

 

Пад такой назвай у Сянне ў мінулую суботу прайшлі масленічныя народныя гулянні. Нават даждлівае надвор’е не перашкодзіла многім жыхарам і гасцям райцэнтра прыйсці ў парк 40-годдзя Перамогі, каб весела адзначыць заканчэнне Масленіцы.

Удзельнікі канцэртнай праграмы — народныя гурты “Вясёлыя музыкі”, ”Вечарынка”, вакальная група Белаліпскага сельскага клуба, іншыя калектывы і выканаўцы мастацкай самадзейнасці — падбадзёрвалі прысутных. Адначасова наведвальнікі маглі пачаставацца смачнымі блінамі, набыць сувенірную прадукцыю Дома рамёстваў, праявіць сябе ў шматлікіх конкурсах і гульнях. Так, напрыклад, юнакі і мужчыны спрабавалі дастаць падарункі, размешчаныя на высокім драўляным слупе. Шматлюдна было і на пляцоўцы, дзе праходзілі спаборніцтвы па дартсе.

Дзетвара ж з захапленнем прымала ўдзел у разнастайных гульнях, якія арганізаваў раённы цэнтр дзяцей і моладзі.

Кульмінацыяй свята, вядома, стаў самы відовішчны рытуал масленіцы – спальванне чучала. Але і пасля гэтага гулянні не спыніліся: гучна іграла музыка, гандлёвыя рады райспажыўтаварыства працягвалі сваю працу, атракцыёны вабілі ўражаннямі ды прызамі.

Ганна КОРСАКАВА

 

Здымкі аўтара