Хорошо показали себя борцы Сенненщины

Пачатак лютага для барцоў раёна быў насычаным на спартыўныя спаборніцтвы. Неаднаразова на рэспубліканскім узроўні гучалі імёны выхаванцаў Анатолія Кучынскага і Анатолія Рыбчанкі, трэнераў Сенненскай СДЮШАР.

 Нашы землякі годна выступілі на спартакіядзе па грэка-рымскай барацьбе сярод школьнікаў 2006-2007 гадоў нараджэння. Усяго ў спартыўных баталіях прыняло ўдзел 318 чалавек. У кожнай вагавай катэгорыі было не менш за 30 спартсменаў. Яраслаў Пазнякоў (85 кг) стаў бронзавым прызёрам. “На працягу ўсіх спаборніцтваў ён паказваў добры вынік. Безумоўна, мог стаць чэмпіёнам, — адзначае Анатоль Рыбчанка. – Чаго не хапіла? Абмежаванасць удзелу ў рознага плану турнірах, выкліканая сённяшняй эпідэміялагічнай сітуацыяй”.

 Данііл Воранаў (вагавая катэгорыя 48 кг) стаў пятым. Ва ўпартым паядынку хлопец змагаўся за трэцяе месца пры ліку 6:6. Аднак уступіў. Яго сапернік, прадстаўнік з Гродна, святкаваў перамогу. У кроку ад фіналу па трох выйграных схватках былі Аляксей Раманенка і Данііл Красноўскі. 

 Вышэйшае спартыўнае майстэрства на барцоўскім дыване паказаў Арцём Кацар (вагавая катэгорыя 55 кг) на чэмпіянаце Рэспублікі Беларусь па грэка-рымскай барацьбе сярод дарослых. Першае месца і выкананне нарматыву майстра спорту – перамога, якая заслугоўвае павагі. Былы выхаванец Сенненскай СДЮШАР сёння вучыцца ў Рэспубліканскім вучылішчы алімпійскага рэзерву. Чэмпіён краіны, за плячыма якога — выступленні ў міжнародных турнірах, упэўнена робіць крокі ў вялікі спорт. Яму ёсць з каго браць прыклад, на каго раўняцца.

 У чэмпіянаце браў удзел і Максім Кажарскі. У вагавай катэгорыі 60 кг стаў другім. Наш зямляк не змагаўся ў фінале, яго кандыдатура была знята. І гэта рашэнне прынялі трэнеры ў сувязі з траўмай нагі спартсмена. Наперадзе ў Максіма яшчэ два ліцэнзійных турніры, каб атрымаць дазвол на ўдзел у Алімпійскіх гульнях.

 Чэмпіянат Рэспублікі вызначыў не толькі моцных атлетаў. Прыемна, што лепшым суддзёй спаборніцтва быў названы майстар спорту Мікалай Губарэвіч. Дарэчы, сенненец — былы выхаванец Анатолія Кучынскага і Анатолія Рыбчанкі. Хлопец звязаў сваё жыццё са спортам. Сёння працуе з дзецьмі ў Мінскім гарадскім цэнтры алімпійскага рэзерву па барацьбе імя А.Мядзведзя.

Ала ЯКАЎЛЕВА.

Фота прадастаўлена А.Рыбчанка.