Спортивный «папа-зал» открыли в Сенно

З карысцю праводзіць час, займаючыся спортам разам са сваімі дзецьмі, маюць магчымасць таты Сенненшчыны. На базе фізкультурна-спартыўнага комплексу “Алімп” пачала працаваць зала для татаў.

“Папа-зал” — унікальны рэспубліканскі праект, ідэйным натхняльнікам якога з’яўляецца БРСМ, накіраваны на прапаганду здаровага ладу жыцця, папулярызацыю адказнага бацькоўства і сямейных каштоўнасцей. Яго сутнасць у тым, каб даць маладым татам магчымасць патрэніравацца, а таксама пагуляць у рухомыя гульні са сваімі дзецьмі ў выхадны дзень або вячэрні час. Такія залы ўжо працуюць ва ўсіх абласцях краіны.

 У Сянне праект увасоблены ў жыццё дзякуючы падтрымцы раённай улады, камісіі па справах непаўналетніх, а таксама сектара спорту і турызму райвыканкама, які ў суботу і ня­дзелю з 17.00 да 18.30 на бясплатнай аснове прадаставіў пляцоўку для заняткаў.

 Звяртаючыся да прысутных на ўрачыстай цырымоніі адкрыцця залы, Зоя Фаміна, намеснік старшыні райвыканкама, падкрэсліла, што гэты праект дапаможа бацькам больш часу право­дзіць са сваімі дзецьм — тут і асабісты прыклад і моцная падтрымка ў першых спартыўных пачынаннях. Яна выказала спадзяванне, што зала не будзе пуставаць, бо кожны знойдзе тут справу па душы. 

 На думку Марыны ­Наваковіч, першага сакратара РК ГА “БРСМ”, праект на руку і мамам, якія  некалькі вольных гадзін змогуць патраціць на сябе альбо на хатнія справы.

 “Такая форма баўлення часу прынясе карысць не толькі нам, але і нашым дзецям, — адзначыў Дзмітрый Беразнеў, адзін з бацькоў. — Больш таго, “папа-зал” можа стаць месцам для пачатку сапраўднага сяброўства паміж сем’ямі”.

 У Сянне старт мола­дзеваму праекту далі незвычайна — ваенна-тактычнай гульнёй лазертаг, паўдзельні­чаць у якой запрасілі жадаючых татаў з дзецьмі. Каля двух гадзін на пляцоўцы панаваў сапраўдны дух спаборніцтва. Напамінам аб гульні і прыемна праве­дзеным часе дарослым і юным сенненцам будуць нагадваць памятныя значкі з сімволікай “папа-зал” ад ­РК ГА “БРСМ”.

 

Ала ЯКАЎЛЕВА.

Фота аўтара.