На Сенненщине прошел праздник капусты

Смачнае мерапрыемства, а інакш і не назавеш свята, прысвечанае капусце, якое на мінулым тыдні прайшло ў аграгарадку Пламя.

 

Мерапрыемства арганізавалі супрацоўнікі РЦКіНТ, як і заўсёды, прапанаваўшы ўдзельнікам свята насычаную праграму. Усе дзействы: жарты, конкурсы, танцавальныя і музычныя нумары былі завязаны на тэатралізаванай імпрэзе, дзе ў цэнтры ўвагі былі Гаспадар і Гаспадыня. Яны ж выступілі ў ролі вядучых свята. 

 «Без капусты ў доме пуста» – менавіта гэтыя словы сталі лейтматывам сустрэчы. Пра тое, наколькі карысна гэта гародніна, а таксама якія стравы можна зрабіць з яе і, што немалаважна, рэцэпты яе квашання расказалі спецыялісты. Імі былі члены калектываў клубаў аматараў народных абрадаў і святаў «Аколіца» Краснасельскага клуба і нацыянальнай кухні «Палымяначка».

Яны ж арганізавалі для ўсіх прысутных і дэгустацыю страў. І чаго толькі не было на іх сталах: і бліны, і пірагі, і пячэнне і булкі! Усё гэта з капусным начыннем.

На свяце было шмат музыкі. Парадавалі сваімі выступленнямі народны фальклорны ансамбль «Вечарынка», вакальны калектыў Пламенскага сельскага клуба, інструментальны ансамбль «Пан музыка» і клуб аматараў фальклору «Крывія». Вядучыя запрашалі ўсіх жадаючых пусціцца ў танцавую, калі ласка, «Лявоніха», «Гапак», «Полька». Нікога не пакінуў абыякавым майстар-клас па побытавых танцах. Гледачы з радасцю падтрымалі і карагодныя гульні.

 

Словам, было весела. Як па­дзяліліся жыхары аграгарадка, прыемна, што менавіта ў іх праходзіць свята капусты. Чым не нагода сустрэцца аднавяскоўцам у восеньскі вечар разам, каб і культурную праграму паглядзець і даведацца шмат цікавага. Яны выказалі спадзяванне, што да­дзенае мерапрыемства стане традыцыйным і будзе збіраць вялікую колькасць людзей.

Ала ЯКАЎЛЕВА.

Фота аўтара.