Александр Степанович Стельмах, ветеран педагогического труда, на днях отметил 90 летний юбилей

 Аляксандр Сцяпанавіч Стэльмах, ветэран педагагічнай працы, на днях адзначыў 90 гадовы юбілей. Многія сенненцы памятаюць яго як загадчыка школьных майстэрняў, выкладчыка матэматыкі, працоўнага навучання, трактарнай і аўтамабільнай справы, дырэктара раённага вучэбна-вытворчага камбіната.

 Ад імя ўсіх педагогаў Сенненшчыны павіншавалі юбіляра са знакавай датай у яго жыцці і ўручылі падарункі старшыня райкама прафсаюза работнікаў адукацыі і навукі Алена Дзергачова і намеснік начальніка аддзела па адукацыі райвыканкама Святлана Панушкіна.

 Сапраўдны канцэрт у двары дома гаспадара наладзіла вакальная група “Аптымісты” ветэранаў педагагічнай дзейнасці, у выкананні якіх прагучала шмат добрых песень. Сярод удзельнікаў калектыву былыя калегі па працы, вучні Аляксандра Сцяпанавіча.

 Усё свае працоўнае жыццё Аляксандр Стэльмах прысвяціў важнай справе – навучанню і выхаванню дзяцей. Так склалася, што яму давялося працаваць у буйных установах адукацыі раёна. У першай гарадской школе вучыў такарнай справе і ваджэнню аўтамабіля. Пасля заканчэння Віцебскага педагагічнага інстытута выкладаў матэматыку і фізіку ў другой гарадской школе. З першага яго выпуска ў 1973 годзе паспяхова здалі экзамены па матэматыцы і паступілі ў вышэйшыя ўстановы адукацыі 7 чалавек.

 Аляксандр Сцяпанавіч актыўна займаўся грамадскай дзейнасцю – 15 гадоў быў сакратаром партыйнай арганізацыі СШ №2. Унёс важкі ўклад у стварэнне на Сенненшчыне новай навучальнай установы – вучэбна-вытворчага камбіната (ВВК). За 13 гадоў працы тут даў пуцёўку ў прафесійнае жыццё многім школьнікам. Толькі вадзіцельскія правы, па падліках Аляксандра Сцяпанавіча за перыяд яго працы ў ВВК, атрымалі звыш 1000 чалавек. “Мне пашчасціла з вучнямі, — адзначае юбіляр. – Ніколі не было дрэнных. Усе, каго давялося вучыць, самі праяўлялі зацікаўленасць да прадмета”.

 Нягледзячы на паважаны ўзрост, Аляксандр Сцяпанавіч у добрай форме. Ні хвіліны не сядзіць на месцы. Займаецца вырошчваннем гародніны. Часам выганяе свой старэнькі “Жыгулёнак”, каб з’ездзіць у роднае Алёхнава на могілкі да бацькоў. Не пакідае бацьку аднаго сын Вячаслаў, які дапамагае па хатняй гаспадарцы. Яму ж Аляксандр Стэльмах у спадчыну перадаў і сваю любімую справу – пчалярства.

Ала ЯКАЎЛЕВА.

Фота аўтара.